Hilway nga makasimba ang mga Saksi ni Jehova sa Russia sang ginrehistro sila sang Russian Federation sang 1992. Nagparehistro liwat ang mga Saksi sang 1999 bangod sang Law on Freedom of Conscience and Religious Associations. Ginatos ka lokal nga relihioso nga mga organisasyon sang mga Saksi ni Jehova ang narehistro kag aktibo sa bilog nga pungsod.

Pero, naeksperiensiahan sang mga Saksi ni Jehova ang mas grabe nga paghingabot nga nagbutang sang ila kahilwayan sa katalagman. Sugod pa sang 2009, ang mga ahensia nga nagapatuman sang kasuguan nagpangampanya sa bilog nga pungsod kontra sa mga Saksi paagi sa sala nga pag-aplikar sang Law on Counteracting Extremist Activity. Gindeklarar sang mga korte sa Russia nga extremist ang mga publikasyon sang mga Saksi ni Jehova, pati ang ila opisyal nga website nga jw.org. Gin-raid sang mga pulis ang ginatos ka balay kag mga tilipunan para sa pagsimba sang mga Saksi. Ginkasuhan sang mga piskal ang mga Saksi sang administrative kag criminal case bangod lang sa pagtambong kag paghiwat sang relihioso nga mga miting.

Bisan pa nga ginpakita sang European Court of Human Rights kag sang iban pa nga internasyonal nga mga organisasyon nga wala gid sila nagaugyon sa ginahimo sang Russia, wala gid naghulag ang Russia para mapahaganhagan ang pagpang-harass kag diskriminasyon sa mga Saksi ni Jehova. Mas labi pa gid gani nga gin-estriktuhan sang mga nagapatuman sang kasuguan ang hilikuton sang mga Saksi ni Jehova.