Sang Marso 15, 2023, ginmanduan sang minister of education sang Rwanda ang tanan nga eskwelahan sa bilog nga pungsod nga ibalik ang mga Saksi ni Jehova nga gin-suspended kay wala sila mag-entra sa mga kustombre sang relihion nga supak sa ila ginapatihan. Indi magnubo sa 80 ka estudyante ang gin-dismiss sa eskwelahan.

Nagpadala sang sulat ang minister of education sa tanan nga meyor kag district executive administrator sang Rwanda. Sa sini nga sulat, ang minister of education nagsiling nga indi dapat pag-i-suspended ang mga estudyante bangod lang sa ginapatihan sang ila relihion. Ginsambit niya ang Constitution of the Republic of Rwanda, kag nagsiling: “Ang tanan nga Rwandan may kinamatarong nga mag-eskwela. Ginapatuman sang gobierno nga ang tanan nga Rwandan may kahilwayan sa paghambal sang ila ginahunahuna kag ginapatihan, kag may kahilwayan sila sa pagsimba kag sa paghimo sang hilikuton sang ila relihion.” Nagsulat man sia nga ang bisan sin-o nga nagapugong sa isa ka bata nga mag-eskwela “nagahimo sang inhustisya kag puede silutan.” Ginpahanumdom niya ang mga opisyal sang eskwelahan nga “wala sang estudyante nga i-dismiss sa eskwelahan bangod sa iya ginahunahuna, konsiensia, relihion ukon pagsimba . . . Gani, dapat untatan sang mga opisyal sang eskwelahan ining pagmaltrato sa mga estudyante kag pabalikon ang gin-dismiss nga mga estudyante sa eskwelahan.”

Ang isa sa mga gin-dismiss amo ang pamatan-on nga si Sister Jeanette Niyonkuru. Sia nagsiling: “Sang gin-suspended ako, isa ka tuig ako nga wala makaeskwela. Sang ulihi nakakita ako sang eskwelahan nga nagbaton sa akon, pero kinahanglan ko maglakat sang duha ka oras kada adlaw pakadto sa eskwelahan.” Ang mga indi makakadto sa malayo nga mga eskwelahan napilitan gid nga mag-untat sa pag-eskwela.

Ang tatlo ka bata ni Brother Hakizimana kag ni Sister Hakizimana gin-dismiss man sa eskwelahan bangod wala sila nag-entra sa ginpatuman sang eskwelahan nga mga activity nga may labot sa iban nga relihion. Si Brother Hakizimana nagsiling: “Nagsulat kami sa headmaster sang eskwelahan, pero wala sia magsabat. Nagpangabay man kami nga makig-istorya sa school director. Namati sia sa paathag sang amon mga kabataan parte sa ila ginapatihan nga base sa Biblia, pero wala gihapon nasolusyonan ang problema. Nalipay gid kami sang mabalitaan namon ang mando sang minister. Dayon, nakigkita kami sa mga opisyal sang eskwelahan, kag nakaeskwela na liwat ang amon mga kabataan.”

Ginapasalamatan gid naton ang minister of education sa paghatag sini nga instruksion, nga nagapangapin sang kinamatarong sa kahilwayan sa relihion sang aton mga estudyante sa Rwanda. Ining mga kabataan nagpakita gid sang “maayo nga konsiensia,” nga nagapadungog sa ngalan ni Jehova.—1 Pedro 3:16.