Halin sang Disiembre 15 asta 31, 2022, ang mga Saksi ni Jehova nagpakigbahin sa una nga tion sa Dakar International Fair (FIDAK) nga ginahiwat kada tuig sa Senegal. Amo ini ang ­ika-30 nga anibersaryo sini nga fair. Sa sini nga fair, may mga handmade craft, mga serbisyo para sa publiko, kag mga cultural interest. Ini nga event nagkuha sang atension sang ginatos ka libo ka bisita halin sa sarisari nga bahin sang Africa kag sa bilog nga kalibutan.

Ang aton mga kauturan nagplastar sang information booth nga nagapakita sang unod sang jw.org pati man sang mga publikasyon parte sa pamilya. Ginpakita sang mga manugbantala ang mga video sa Mangin Abyan ni Jehova kag sa Whiteboard Animation nga mga serye. Ginpakita man nila ang mga interbyu sang mga tin-edyer halin sa serye sang video nga Ang Ginasiling sang Iban.

Ang pila sa mga bisita indi pamilyar sa aton website kag ginbuksan nila ini sa ila mga cellphone didto mismo sa booth. Madamo ang nagdayaw nga ang jw.org may available nga mga content sa sobra 1,000 ka lenguahe, lakip ang lokal nga lenguahe nga Wolof. Sobra 3,000 ka publikasyon ang ginhatag sa mga bisita nga nagpangabay sini.

Ang isa ka bisita nagsiling, “Ang amon pagkadto sa inyo booth amo ang pinakaimportante nga bahin sang amon pagbisita sa fair.” Ang isa pa nagsiling, “Kon may premyo para sa pinakanami nga stand, kamo gid ang madaug!”

Si Brother Martin Laud, nga nagbulig sa pag-organisar sini nga booth, nagsiling: “Nalipay gid kami sa pag-abiabi sa madamo nga bisita halin sa sarisari nga pungsod. Madamo sa ila ang nagpasalamat sa amon bangod naghatag kami sang praktikal nga impormasyon halin sa Biblia nga wala sing bayad.”

Nalipay kita sa positibo nga resulta sa aton pagpakigbahin sa sini nga event. Isa ini ka paagi nga padayon nga ginasugid sang katawhan ni Jehova ang “praktikal nga kaalam” halin sa Pulong sang Dios.—Hulubaton 3:21, 22.