Halin sang Mayo 17 asta 26, 2024, may sobra 600 ka kauturan halin sa Serbia kag Montenegro ang nagpartisipar sa isa ka special preaching campaign sa pila ka malayo nga mga lugar sa Serbia. Amo ini ang pinakauna nga face-to-face nga preaching campaign nga ginhimo sang mga Saksi ni Jehova sa Serbia sa sobra 20 ka tuig. Ginabanta nga sobra 1.5 ka milyon ka tawo, halos 25 porsiento, sang populasyon sang Serbia ang nagaistar sa malayo nga mga lugar nga indi pirme makadtuan sang aton mga kauturan. Kanami gid kay sobra 1,800 ang nagpangabay sang Bible study sa tion sang campaign.

Sa banwa sang Beli Potok, may isa ka babayi nga nanamian gid sa ila pag-istoryahanay sang mga Saksi, gani gintawgan niya ang iya mga tupad balay kag nagsiling: “May mga tawo nga makadto sa inyo kag sugiran nila kamo sang parte sa Dios kag sa Biblia. Pamatii ninyo sila sing maayo!” May isa ka babayi nga nagaistar sa katapusan nga balay sa baryo. Ginhulat gid niya ang mga Saksi kag ginpasulod niya sila kag excited na sia nga maistorya sila. Nagsiling sia nga naka-attend sia sang una sa Memoryal sang kamatayon sang Cristo. Gusto gid sang babayi nga magpa-Bible study.

May duha ka Saksi nga naga-cart sa banwa sang Smederevska Palanka kag ginpalapitan sila sang isa ka lalaki nga si Radomir. Nagsiling sia nga nalipay gid sia nga makakita sang mga tawo nga relihioso sa ila nga banwa. Namangkot sia dayon parte sa libre nga pagtuon sa Biblia nga naka-display sa cart. Pagkatapos mapaathag sa iya sang mga brother ang parte sa interactive nga pagtuon sa Biblia, malipayon nga nagpasugot si Radomir nga magpa-Bible study.

Isa gid ka pagpakamaayo ining special preaching campaign para sa aton mga kauturan sa Serbia kag para sa tanan nga nauhaw sang kamatuoran sa Biblia.—Juan 7:37.