Ang 66th International Belgrade Book Fair ginhiwat sa Belgrade, Serbia, halin sang Oktubre 21 asta 29, 2023. Sobra 190,000 ka tawo ang nag-attend sa sini nga event. Nagplastar ang mga Saksi ni Jehova sang information booth nga nagapakita sang praktikal nga importansia sang Pulong sang Dios. Sobra 100 ka kauturan ang nagtudlo sa mga bisita kon paano nila makita ang mga sabat sang Biblia sa importante nga mga pamangkot.

May isa ka babayi nga nagpalapit sa booth kag nagsiling sa sister nga madamo sia sang pamangkot parte sa Biblia. Nalipay gid sia nga may makilala nga makabulig sa iya nga makita ang mga sabat. Nagplano sila para mapadayon ang ila pag-istoryahanay.

Ang isa ka pamatan-on nga lalaki nakabaton sang kopya sang brosyur nga Gintuga Bala ang Kabuhi? Nagsiling sia nga bisan pa nagapati sia sa Dios, nabudlayan gihapon sia nga maintiendihan ang parte sa pagpanuga sa Biblia. Halimbawa, ginpaligban niya kon bala ginatudlo sang Biblia nga gintuga sang Dios ang tanan sa sulod sang anom lang ka adlaw. Nanamian gid sia sang ginpakita sa iya sang mga Saksi ang isa ka artikulo sa jw.org nga nagasabat sa sina nga pamangkot.

Nanamian ang duha ka tin-edyer nga babayi sa mga libro nga Questions Young People Ask—Answers That Work, Volume 1 kag 2. Excited gid sila sang mahibaluan nila nga ini nga mga libro may importante nga mga topiko parte sa pagpangita sang matuod nga mga abyan, kon paano mangin maayo nga estudyante sa eskwelahan, kag mabal-an ang kinalain sang puppy love kag true love. Isa sa ila ang malipayon nga nagsiling: “Kanami gid sini nga mga libro. Basahon gid ini namon!”

Nagapasalamat gid kita sa aton mga kauturan sa Belgrade sa ila pagpangabudlay sa book fair. Kabay pa nga pakamaayuhon sila ni Jehova sa ila mapisan nga pagpangabudlay para ‘dayag nga mapahayag ang iya ngalan.’—Hebreo 13:15.