Sang Mayo 27, 2023, gin-release ni Brother Jaroslav Sekela, miembro sang Branch Committee sa branch sang Czech-Slovak, ang The Bible—The Book of Matthew sa Romany (Eastern Slovakia) nga lenguahe. Gin-release ini nga Biblia paagi sa isa ka espesyal nga miting nga ginhiwat sa banwa sang Michalovce sa eastern Slovakia. Ang tanan nga nag-attend sa sining espesyal nga miting nakabaton sang naimprinta nga kopya. Nangin available man ini dayon sa digital nga pormat.

Ang Romany daw pareho man sa Bengali, Hindi, kag Punjabi nga mga lenguahe. Madamo nga mga tinaga sa Romany ang naghalin sa lokal nga mga lenguahe sa mga rehiyon sa diin nag-istar ang mga tawo nga nagahambal sang Romany. Gani may Romany nga mga tinaga nga ginahambal sa eastern Slovakia nga mahimo sarisari ang kahulugan depende sa rehiyon. Ginbinagbinag sang translation team ang sarisari nga kahulugan sini nga mga tinaga sang gin-translate nila ining libro sa Biblia.

May available man nga translation sang Biblia sa Romany (Eastern Slovakia), pero gin-islan sini ang ngalan sang Dios nga Jehova, sang mga tinaga pareho sang o Raj kag o Del, nga buot silingon “Ginuo” kag “Dios.” Dugang pa, madamo nga bersikulo ang gin-paraphrase, gani nabudlayan ang mga bumalasa nga maintiendihan ang orihinal nga kahulugan. Ining bag-o gin-release nga translation sang libro sang Mateo may ngalan ni Jehova kag mahapos intiendihon.

Ang isa ka translator nga nakabulig sa sini nga proyekto nagsiling: “Sa pag-translate sang Biblia, importante gid nga sibu ang translation sang mensahe halin sa Dios para makilala sia kag palanggaon sang mga tawo.”

Ang isa pa ka translator nagsiling: “Bangod pirme makaeksperiensia sang diskriminasyon ang mga Romany, makapaumpaw gid para sa ila ang Mateo 10:31. Ginapahanumdom sini sa amon nga natalupangdan ni Jehova bisan ang mga maya, nga may gamay nga balor para sa mga tawo sa tion sang Biblia. Ti, mas importante kami sangsa madamo nga maya.”

Nagasalig kita nga ini nga translation makabulig sa mga bumalasa nga padayon nga magtuon kag mabatyagan ang pagpalangga kag pag-ulikid ni Jehova sa ila.—1 Pedro 5:7.