Ginhiwat sang kauturan sa Slovakia ang una nga rehiyonal nga kombension sa lenguahe nga Romany sang Hulyo 20 kag 21, 2019, sa Winter Stadium sa Michalovce. Ang pinakamadamo nga nagtambong sa sining ginpalip-ot nga programa nakalab-ot sa 1,276 kag 19 ang nabawtismuhan.

Nalakip sa nagtambong ang kauturan halin sa apat ka pungsod: Belgium, Czech Republic, Great Britain, kag Ukraine. Ang mga tumalambong nalipay gid sa pagtan-aw sang video drama nga Ang Sugilanon ni Josias: Higugmaa si Jehova; Dumti ang Malaut sa ila kaugalingon nga lenguahe.

Ini nga kombension ginhiwat lima ka tuig sa tapos nga gintukod ang una nga Romany nga kongregasyon sa Slovakia sang Nobiembre 2014. Subong, may 9 ka Romany nga kongregasyon, 10 ka grupo, kag 14 ka pregroup sa mga lugar nga ginadumalahan sang sanga sang Czech-Slovak.

Si Peter Tirpak, nga manedyer sang Winter Stadium, nagsiling: “Kanami gid sang pagbuligay sang mga Saksi ni Jehova. Ginatuman gid ninyo ang inyo ginahambal. Gusto gid namon nga magbalik kamo diri.”

Si Peter Varga, ang convention program overseer, nagsiling: “Subong ko lang naeksperiensiahan ang amo sini nga klase sang kombension. Para sa mga kauturan naton nga nagahambal sing Romany, isa ini ka importante nga hitabo sa ila pag-alagad kay Jehova, kag indi gid nila ini malipatan. Sa tapos sang katapusan nga ambahanon, naghinaksanay sila, bisan pa subong lang sila nagkilitaay. Madamo sa ila ang naghibi.”

Nagakalipay kita upod sa 1,010 ka manugbantala nga nagahambal sing Romany sa Slovakia. Ginapakita sini nga mga kombension ang matuod nga gugma sa tunga sang mga alagad ni Jehova.—Juan 13:34, 35.