Sang Disiembre 18, 2021, ginpagua ang ginrebisar nga Bag-ong Kalibutan nga Badbad sang Balaan nga Kasulatan sa Slovenian nga lenguahe. Ginpahibalo ni Brother Gerrit Lösch sang Nagadumala nga Hubon ang pag-release sini sa isa ka narekord na nga daan nga programa nga gin-stream sa mga 2,000 ka tumalambong. Ini nga Biblia gin-release sa digital format, kag ang naimprinta nga mga kopya sini mangin available sa 2022.

May translation na sang Biblia sa Slovenian halin pa sang 1584. Sa sina nga tuig, gin-release ang Dalmatin Bible, ang una nga kompleto nga Biblia sa Slovenian. Subong, may 80 ka kopya na lang ang Dalmatin Bible, kag ang isa sini ara sa Bible museum sa World Headquarters sang mga Saksi ni Jehova sa Warwick, New York, U.S.A.

Sang 1925, si Brother Franz Brand, isa ka International Bible Student, nag-preaching sa mga tawo sa iya ulubrahan, nga isa ka barbershop sa Maribor, Slovenia. Sina man nga tuig, regular nga nagtipon ang isa ka gamay nga grupo para istoryahan ang Biblia. Sang 1930, ang mga Estudyante sa Biblia sa Slovenia, naghimo sang isa ka opisina para suportahan ang pagtudlo sa Biblia nga hilikuton sa sina nga pungsod. Sang 2009, naeksperiensiahan sang aton mga kauturan ang isa ka talalupangdon nga hitabo sang gin-release ni Brother Samuel Herd sang Nagadumala nga Hubon ang Bag-ong Kalibutan nga Badbad sa distrito nga kombension nga ginhiwat sa Ljubljana, Slovenia.

Sang World War II kag sang nagsunod nga mga tuig, grabe nga paghingabot ang naatubang sang mga Saksi ni Jehova sa Slovenia. Ang una nga naghingabot sa ila amo ang mga Nazi, dayon ang lokal nga mga awtoridad. Sa sini nga mga tion, madamo nga kauturan ang ginpriso kag ang iban sa ila ginsentensiahan sang kamatayon. Sang 1953, nag-ayoayo ang sitwasyon sang ginkuha sang awtoridad ang pagdumili sa mga Saksi ni Jehova kag ginhatagan na sila sang kahilwayan sa pagsimba. Subong, may ara na 1,757 ka manugbantala sa Slovenia.

Makasalig kita nga ang mga kauturan sa Slovenia nagaugyon sa ginsiling ni Brother Lösch sang gin-release niya ang Biblia: “Tun-i ini sing maayo para mangin sagad ka sa paggamit sini nga Biblia, kag buligi ang iban nga makabenepisyo sa gahom sini! . . . Ang pag-release sang [gin-rebisar nga] Bag-ong Kalibutan nga Badbad sang Balaan nga Kasulatan sa Slovenian nga lenguahe magabulig sa imo nga ‘magpanguyapot sing malig-on sa matutom nga pulong’!”—Tito 1:9.