Sang Disiembre 7, 2022, ginbuksan ang remote translation office (RTO) para sa Venda nga lenguahe sa banwa sang Makhado, South Africa. Ang translation team may pulo ka full-time nga translator kag walo ka part-time nga translator.

Ginabanta nga may 1.2 ka milyon ka tawo nga nagahambal sang Venda sa South Africa kag may 100,000 sa Zimbabwe. Subong, may ara 28 ka kongregasyon nga nagahambal sang Venda nga lenguahe sa sining duha ka pungsod, nga may mga 800 ka manugbantala.

Sa sini nga propiedad, may natukod na nga bilding nga gin-renovate kag ginhimo nga apat ka apartment. May ginpatindog nga bag-o nga bilding para sa translation office. Nagbakal sang tatlo pa gid ka dugang nga apartment malapit sa translation office para himuon nga ilistaran.

Ang desinyo sang RTO ginbase sa tiempo sa sini nga lugar. Si Brother Jody Palvie, nga project manager sang Local Design/Construction Department, nagsiling: “Mainit gid ang tiempo diri, gani wala na lang gin-utod ang dalagku nga mga kahoy para mahandong, kag madamo nga bahin sang bilding ang gin-tiles kag ginsemento para mangin mas mabugnaw.”

Pirme na maistorya sang translation team ang mga tawo nga nagahambal sang Venda sa sining bag-o nga lokasyon. Ang isa ka translator nagsiling: “Maistorya na namon ang mga tawo nga nagahambal sini nga lenguahe kada adlaw. Mas ginpanami pa gid sini ang amon translation. Nakabulig ini sa amon nga gamiton ang mga tinaga kag mga ekspresyon nga ginagamit kada adlaw.” Ang isa pa ka translator nagsiling: “Malapit na kami subong sa mga kauturan nga nagahambal sang Venda. Makabulig sila sa pagrekord sang mga video kag audio nga mga publikasyon.”

Kabalo kita nga padayon nga pakamaayuhon ni Jehova ang panikasog sining mga kauturan nga nagatinguha nga ‘dayawon si Jehova’ sa mga tawo nga nagahambal sang Venda.—Salmo 145:21.