Sang katapusan nga bahin sang Abril 2019, ang nasidlangan nga baybayon sang South Africa nakaeksperiensia sang mabunok nga mga pag-ulan. Ining sigesige nga pag-ulan nagresulta sa baha kag mga mudslide sa madamo nga lugar sa Durban kag sa palibot sini, sa probinsia sang KwaZulu-Natal. Base sa report, indi magnubo sa 70 ka tawo ang napatay.

Ang sanga sa South Africa nagreport nga wala sing kauturan nga nahalitan ukon napatay. Pero, ang mga balay sang indi magnubo sa 19 ka pamilya naguba bangod sa mudslide ukon sa baha. Ginbahaan man ang tatlo ka Kingdom Hall.

Sa pagpanguna sang Disaster Relief Committee, ginausisa na sang mga boluntaryo sang Local Design/Construction kon daw ano kadaku ang naguba sa kada balay. Kon nakita nga ara sa katalagman ang kabuhi sang kauturan, nagahimo sila sing mga pamaagi nga masaylo anay sa iban nga lugar ining mga kauturan.

Nagasalig kita nga padayon nga suportahan ni Jehova ang aton kauturan sa South Africa samtang ginaatubang nila ining mabudlay nga mga sitwasyon.—Salmo 34:19.