Dali na lang matapos sang Local Design/Construction Department (LDC) sa South Africa ang pag-renovate sang isa ka bilding nga pang-opisina sa Durban. Himuon ini nga remote translation office (RTO) para sa South African Sign Language (SASL). Ginbakal sang branch ini nga bilding sang Marso 2020 kag sang ulihi, nagbakal man sang mga apartment malapit sa sini. Masaylo sa sini nga mga apartment ang mga translator sa Mayo 2022.

Ang RTO may 17 ka bethelite kag 25 ka part-time remote volunteer. Sa sining bag-o nga lokasyon sang RTO, makahimo sila sing mataas sing kalidad nga translation sang aton mga literatura para sa 283 ka apa ukon may diperensia sa palamatin-an nga mga manugbantala sa South Africa. Makabenepisyo man sa sini ang mga 450,000 ka apa ukon may diperensia sa palamatin-an nga mga tawo nga nagaistar sa pungsod. Ang kalabanan sa apa kag may diperensia sa palamatin-an nga mga tawo sa South Africa nagaistar sa probinsia sang KwaZulu-Natal. Ang Durban amo ang pinakadaku nga siudad sa probinsia.

Si Brother Sibusiso Mzizi, nga miembro sang South African Sign Language team, nagsiling: “Nagapati kami nga daku gid ang mabulig sining bag-o nga opisina sa pagbantala sa teritoryo sang sign-language sa South Africa kag sa pagpabakod sang mga kongregasyon.”

Ginapasalamatan naton si Jehova bangod sa pagpakamaayo niya sa aton mga panikasog sa SASL kag para sa pag-uswag sini nga proyekto.—Salmo 127:1.