Sugod sang Enero 29 asta Marso 11, 2024, sobra 11,000 ka kauturan halin sa sarisari nga lugar sang South Africa ang nagpartisipar sa preaching campaign sa Xhosa nga lenguahe sa Eastern Cape Province sang pungsod. Ang kalabanan sa pito ka milyon ka tawo nga nagaistar sa sini nga probinsia nagahambal sang Xhosa. Bilang resulta sini nga kampanya, sobra 2,700 ka tawo ang nangabay sang personal nga pagtuon sa Biblia.

Sa tion sang kampanya, nakilala sang duha ka sister ang isa ka babayi nga napatyan sang utod nga lalaki bangod sang aksidente duha ka semana lang ang nagligad. Samtang ginaistorya sang babayi sa mga sister ang parte sa kamatayon sang iya utod, ginpaumpawan nila sia paagi sa pagbasa sang Bugna 21:3, 4. Gusto pa niya nga makatuon sing dugang parte sa promisa sang Biblia nga dulaon na ang kamatayon kag pag-antos, gani namangkot ang babayi kon san-o kag kon diin ginahiwat ang aton mga miting. Nasugdan ang pag-Bible study sa sini nga babayi.

Naistorya sang isa ka sister nga si Zukiswa ang isa ka babayi nga may ara sang malala nga arthritis. Bangod sang iya kondisyon, nabudlayan sia magluto para sa iya kabataan. Nabalaka ang babayi nga basi wala sila sang makaon sina nga adlaw, bangod wala sia sang kusog para magmasa sang tinapay. Nagsiling si Zukiswa nga sia na lang ang mamasa sang linamas samtang ginasugiran ang babayi sang isa ka sister parte sa mensahe sang Biblia. Nagdayaw gid sia bangod sang ila pag-ulikid kag bulig, gani excited gid sia nga nanugid sa iya madamo nga abyan parte sa ginhimo sang duha ka sister sa iya. Wala madugay, nagpa-Bible study sia upod sa mga Saksi.

Samtang nagapamalaybalay sa siudad sang Gqeberha, nakilala sang duha ka brother ang isa ka lalaki nga nautod ang isa ka tiil. Nagsiling ang lalaki nga madugay na niya ginapamensar kon ngaa gintugutan sang Dios nga maggahom si Satanas sa kalibutan, bisan pa ang mga tawo iya sang Dios. (1 Juan 5:19) Ginsabat sang mga brother ang iya mga pamangkot paagi sa Biblia. Sina man nga adlaw, sang natan-aw niya ang video nga Ngaa Ginapasugtan sang Dios ang Pag-antos?, malipayon nga nagpasugot sila nga duha sang iya asawa nga magpa-Bible study.

Ginpangabay sang isa ka sister, nga nagabantala man sa Gqeberha, ang isa ka babayi kon puede niya basahon ang Salmo 37:29. Sa tapos ini mabasa sang babayi sa iya personal nga kopya sang Biblia, nagsiling sia nga indi niya ini maintiendihan. Ginbasa dayon sang sister ato nga bersikulo sa Bag-ong Kalibutan nga Badbad sang Balaan nga Kasulatan sa Xhosa. Ang babayi nagsiling: “Ang tinaga sa Xhosa nga gingamit sa sini nga Biblia natural gid pamatian. Mas naintiendihan ko ini sangsa akon Biblia!” Subong, nalipay gid sia nga naga-Bible study.

Nalipay kita nga madamo nga tawo nga nagahambal sang Xhosa sa bilog nga South Africa ang nagbaton sang mensahe sang paglaum halin sa “Dios nga nagahatag sang tanan nga sahi sang lugpay” paagi sa iya Pulong, ang Biblia.—2 Corinto 1:3.