Sa South Africa, ginpasalamatan sang mga nagasuporta sa mga apa ang mga Saksi ni Jehova kay nagabulig sila para mag-ayoayo ang kabuhi sang mga apa. Ginahimo ini sang mga Saksi paagi sa manami nga mga video sa South African Sign Language (SASL). Ginpasalamatan sila pagkatapos ma-release ang mga libro sang Galacia kag Efeso sa SASL nga Bag-ong Kalibutan nga Badbad Sang Cristianong Griegong Kasulatan sang Nobiembre 15, 2021. Napulo na ka libro sang Biblia sa SASL ang nahimo. Apat pa ka dugang nga libro sang Biblia ang i-release sa Abril 2022. Tanan ini available sa jw.org kag sa JW Library Sign Language nga app.

Si Minna Steyn, nga isa ka education specialist kag deputy chief sang Western Cape Government, nagsiling parte sa mga Saksi: “Nanamian gid ako magtan-aw sa mga signer kag gusto ko gid sila i-congratulate kag pati man ang organisasyon bangod sa standard kag kalidad sang ila pagsenyas.”

Si Bongani Makama, presidente sang Federation of the Disabled sa Eswatini, nagsiling: “Ginapasalamatan namon ang mga Saksi ni Jehova kay ginpaposible nila nga mabaton sang mga apa kag sang mga may diperensia sa palamatin-an ang mga impormasyon nga mabaton lang sadto sang mga makabati.” Nagsiling pa sia: “[Ang mga apa] dapat may Biblia sa ila kaugalingon nga lenguahe. Gani ginapasalamatan gid namon ang mga Saksi ni Jehova kay bangod sa ila panikasog may mga libro na sang Biblia ang mga apa sa ila kaugalingon nga lenguahe. Eksayted na kami nga mangin available na ang 66 ka libro sang Biblia sa sign language.”

Mga 450,000 ka tawo sa South Africa ang nagagamit sang SASL. May 283 ka Saksi nga apa ukon may diperensia sa palamatin-an sa South Africa. Bangod sa panikasog sang mga Saksi, ang “tanan nga sahi sang tawo” nagatuon sang sibu nga ihibalo tuhoy sa kamatuoran, pati ang mga apa nga ara sa mga teritoryo nga sakop sang branch sa South Africa.—1 Timoteo 2:4.