Ginpagua sang mga Saksi ni Jehova ang Bag-ong Kalibutan nga Badbad Sang Cristianong Griegong Kasulatan sa Kwanyama sa isa ka rehiyonal nga kombension sa Ondangwa, Namibia, sang Agosto 16, 2019. Si Brother Franco Dagostini, nga miembro sang Komite sang Sanga sa South Africa, amo ang nagpagua sini nga Biblia sa una nga adlaw sang kombension sa Ondangwa Trade Fair Hall.

Ang isa ka miembro sang translation team nagsiling: “Ang Bag-ong Kalibutan nga Badbad Sang Cristianong Griegong Kasulatan makabulig sa mga tawo nga mabasa kag maintiendihan sing mas maathag ang mensahe sang Biblia. Malipay gid ang aton kauturan nga makita ang ngalan ni Jehova sa nagakaigo nga lugar sini.”

Sa teritoryo sang sanga sang South Africa, mga 490 ang manugbantala nga nagahambal sing Kwanyama. Nagabantala sila sa ginabulubanta mga 1.4 ka milyon ka tawo nga nagahambal sing Kwanyama sa Angola kag Namibia.

Ang Bag-ong Kalibutan nga Badbad sang Balaan nga Kasulatan na-translate na sing kompleto ukon ang pila ka bahin sini sa 184 ka lenguahe, lakip ang 25 ka kompleto nga rebisyon base sa 2013 nga edisyon. Nalipay kita nga gamiton sang aton kauturan ini nga Biblia sa pagsugid sang Pulong sang Dios sa madamo nga nagahambal sing Kwanyama.—Binuhatan 2:37.