Sang Abril 23, 2023, gin-release ang The Bible—The Book of Matthew sa Chinese Sign Language (CSL) sa isa ka programa nga ginhiwat sa South Korea. Amo ini ang una nga bes nga may libro sa Biblia nga gin-release sa CSL. Halos 200 ka manugbantala halin sa duha ka CSL nga kongregasyon sa South Korea ang nag-attend sa sini nga programa. Ining translation sa sign-language puede na ma-download sa jw.org kag sa JW Library Sign Language nga app.

Nagpangabudlay gid ang translation team para ma-translate ining libro sa Biblia sa natural kag simple nga lenguahe. Parte sa sini nga translation, ang isa ka translator nagsiling: “Apa ang duha sa tatlo ka miembro sang translation team, gani pirme namon ginabinagbinag kon paano nagapamensar ang mga apa. Sa bulig nila, nangin mahapos ang pag-translate.”

Ang isa pa ka translator nagsiling: “Sang ginhimo namon ini nga translation, mas naintiendihan ko pa gid kon ano ang ginhimo ni Jesus, kon ano ang iya inagihan, kag kon ano ang iya gintudlo sang diri sia sa duta.”

Ang isa ka apa nga manugbantala nga naka-attend sa sini nga programa nagsiling: “Antes sini nga release, pila lang ka teksto ang available sa CSL. Daw pareho nga pila pa lang ka bahin sang isa ka puzzle ang naplastar. Subong nga na-release na ang libro sang Mateo, excited na gid ako nga makita kon ano gid ang hitsura sang piktyur.”

“Ang mga publikasyon sa sign-language halin sa organisasyon ni Jehova, kag subong ining libro sang Mateo sa CSL, nakabulig sa akon nga mabatyagan nga palangga gid ni Jehova ang mga apa kag gusto gid niya sila buligan,” siling sang isa pa ka apa nga manugbantala.

Ginapasalamatan gid naton si Jehova sa sining bag-o nga translation. Makabulig gid ini sa aton mga kauturan nga padayon nga simbahon si Jehova sa “espiritu kag kamatuoran.”—Juan 4:24.