Sang Enero 28, 2021, nagdesisyon ang Supreme Court sang South Korea nga indi krimen para sa isa ka tawo ang pagpangindi nga mag-training para sa reserve forces bangod sa ginapatihan sang iya relihion. Gani, ang aton mga brother nga nangin soldado sadto antes mangin Saksi ni Jehova indi na pagsilutan kon indi na sila mag-entra sa sini nga training.

Ang tanan nga lalaki sa South Korea nga nangin soldado dapat regular nga mag-training para sa reserve forces sa sulod sang walo ka tuig. Buot silingon, ang mga brother naton nga nangin soldado sadto mahimo ipatawag kag silutan sang pila ka beses kon indi sila mag-entra sa training. Ang isa naton ka brother nag-atubang sa pulis, sa piskal, sa trial court, kag sa appeal court sing mga 60 ka beses sa isa lang ka tuig.

Sang 2018, nagdesisyon ang duha ka mataas nga korte sa Korea, ang Constitutional Court kag ang Supreme Court, nga ang pagpangindi nga magsoldado bangod sa konsiensia indi isa ka krimen. Bangod sini, posible na para sa isa ka Cristiano nga maghimo sing alternative civilian service. Pero wala nalakip sa desisyon sang korte ang parte sa Reserve Forces Act. Sa sini nga kasuguan, puede silutan sang gobierno ang mga nagpangindi nga mag-training para sa reserve forces bangod sa ginapatihan sang iya relihion.

Base sa desisyon sang Supreme Court sining karon lang, puede na magpangindi ang isa ka tawo nga mag-training para sa reserve forces bangod sa iya konsiensia. Gani, ang mga kauturan naton nga madugay na nga nagabalikbalik sa korte mahimo na mag-apply para sa alternative civilian service, imbes nga multahan sila sing pila ka beses ukon prisuhon. Si Brother Nam Tae-hee, nga isa sa mga ginkasuhan, nagsiling: “Pagkatapos sang sulitsulit ko nga pag-atubang sa korte sa sulod sang walo ka tuig, ginkilala gid man ang akon mga kinamatarong. Pamatyag ko, daw ginkuha ang mabug-at nga dala nga madugay ko na nga ginapas-an.”

Nagakalipay gid kita kag nagapasalamat kay Jehova upod sa aton mga kauturan sa Korea kag sa ila mga pamilya nga ‘nagbatas sang kabudlayan kag nagaantos sing indi makatarunganon bangod sang pagtuman sa Dios’!—1 Pedro 2:19.