Pila lang ang nakahibalo nga ginhingabot sadto ang mga Saksi ni Jehova sa Korea. Amo sina ang makita sa eksibit sa National Memorial Museum of Forced Mobilization under Japanese Occupation, nga ara sa Busan, ang ikaduha sa pinakadaku nga siudad sa Korea. Ining pinasahi nga eksibit nga ginbuksan sa publiko nga may tig-ulo nga “Wala Nagabag-o nga Konsiensia sa Nagabag-o nga Kasaysayan” nagsugod sang Nobiembre 12, 2019, kag matapos sa Disiembre 13, 2019. Ginasaysay sini ang neutral nga panindugan sang mga Saksi sa Korea sang nagligad nga sobra 80 ka tuig sang panahon nga ginsakop ang pungsod sang mga Japanese kag ang pagpamintas sa ila.

Ini nga eksibit una nga ginpakita sang Septiembre 2019 sa Seodaemun Prison History Hall * sa Seoul. May 51,175 ka bisita nga nagtan-aw sa sini nga eksibit, lakip ang 5,700 ka kauturan nga delegado sang internasyonal nga kombension sa Seoul.

Ang hitabo nga gintawag Deungdaesa Incident natabo sang ang mga Saksi ni Jehova kag ang mga nagpakita sing interes sa mensahe sang Biblia gin-aresto kag ginpriso sugod sang Hunyo 1939 asta Agosto 1945. Ginpriso sila bangod nangindi sila nga magsimba sa emperador kag bangod nagapati ang gobierno nga ang ila mga literatura nagapalig-on sa mga tawo nga magrebelde kag indi mag-entra sa inaway. Sisentay-seis ang gin-aresto, nga buot silingon, ang halos tanan nga Saksi ni Jehova sa Korea sadto nga tion. Ang mga ginpriso mapintas nga gin-usisa kag gin-torture. Anom ka mga Saksi ang napatay bangod sang mga balatian nga resulta sang mabudlay katama nga sitwasyon sa prisuhan.

Si Brother Hong Dae-il, nga nagaalagad sa Public Information Desk sa Korea, nagsiling: “Madamo sa Korea ang wala kabalo nga ang isyu parte sa kinamatarong nga magpangindi nga magsoldado bangod sa konsiensia nagsugod sang nagligad nga 80 ka tuig sang ginsakop sang mga Japanese ang pungsod. Ining pinasahi nga eksibit isa ka maayo nga kahigayunan para masugid ining tumalagsahon nga istorya sa una nga tion.”

Si Propesor Han Hong-gu, nga isa ka historian nga nagtambong sang ginbuksan ini nga eksibit, naghambal parte sa mga Saksi nga wala gid nagkompromiso: “Para sa akon, sila ang pinakamaayo nga halimbawa sang mga tawo nga nagasunod gid sang ila konsiensia kag padayon nga nagapanindugan sa ila mga ginapatihan. . . . Subong nga mas ginarespeto na sang mga tawo ang mga nagapanindugan suno sa ila konsiensia, ang mga Saksi ang una nga dapat naton dumdumon.”

Interesado gid sa sining eksibit ang mga historian kag ang media, gani mas nabal-an sang madamo nga tawo ang parte sa kasaysayan sang mga nagpangindi nga magsoldado bangod sa konsiensia—ang topiko nga nangin isyu gid sa Korea halin sang nagligad nga tuig. Sang Hunyo 28, 2018, ang Constitutional Court nagdesisyon nga may nalapas ang South Korea bangod wala ini naghatag sang alternative service. Pagligad sang apat lang ka bulan, sang Nobiembre 1, ang Supreme Court nagdesisyon nga ang pagpangindi nga magsoldado bangod sa konsiensia indi krimen. Bangod sining mga desisyon sang korte, ginpagua ang aton mga brother nga napriso sa South Korea kag nagpaposible nga makahimo sang mga kasuguan parte sa alternative civilian service.

Ang mabakod nga pagtuo kag kaisog sang aton mga kauturan sa Korea sadto nga ginpakita sa sining eksibit nagapahanumdom sa aton sining makapalig-on nga mga tinaga: “Si Jehova yara sa akon tupad; indi ako mahadlok. Ano ang mahimo sang tawo sa akon?”—Salmo 118:6.