Sa una nga tion sa kasaysayan sang South Korea, ang mga piskal nangabay sa mga appeal court nga ideklarar nga wala sing sala ang lima ka utod nga nagpangindi nga magsoldado. Bilang resulta, ginpamatbatan sang korte ang mga utod nga wala sing sala, gani indi na sila puede pasakaan liwat sini nga kaso. Ginbaliskad sini nga desisyon ang tanan nga desisyon sang mga lower court nga nagasumbong nga ang aton mga utod nagalikaw lang nga magsoldado.

Ining pamatbat nga wala sing sala, nga gindeklarar sang Disiembre 14, 2018, nangin basihan para ibasura ang kaso sang sobra 900 ka kauturan nga may amo man sini nga kaso nga naka-pending sa mga korte sang Korea. Ang mga utod nga ginpamatbatan nga wala sing sala magahulat sang implementasyon sang alternative service program nga puede nila himuon sa baylo nga magsoldado.

Ang desisyon sang mga appeal court ginbase nila sa duha ka talalupangdon nga desisyon nga ginhimo sang Constitutional kag Supreme Court sang Korea sang 2018. Gindula sini nga desisyon ang 65 ka tuig nga pagsulundan nga awtomatiko nga nagapriso sa mga nagapangindi nga magsoldado, bisan daw ano pa ka sinsero sang ila relihioso nga pagpati.

Ang desisyon sang duha ka mataas nga korte, nga nagabaton nga ang pagpangindi nga magsoldado isa ka kinamatarong nga nabase sa kahilwayan sang konsiensia, gindayaw sang mga organisasyon sang human rights. Ang National Human Rights Commission sang Korea nagsiling: “Ang desisyon sang tanan nga katapo sang Supreme Court nagtapos sa masakit nga kasaysayan sang pagsilot sa mga nagapangindi nga magsoldado bangod sa konsiensia nga nagsugod pa sang dekada 50 kag nagsilot sa halos 20,000 ka nagpangindi nga magsoldado bangod sa konsiensia . . . Luyag namon ipabutyag ang amon tudok nga pagtahod sa mga sakripisyo sang mga nagpangindi nga magsoldado bangod sa konsiensia kag sa mga ginbatas sang ila mga pamilya.”

Ang mga nagpangindi nga magsoldado bangod sa konsiensia ginpangabay nga pamatud-an nga ang ila pagpangindi nga magsoldado nabase sa ila “madalom, malig-on kag matuod” nga mga ginapatihan. Ang mga hukom ginpangabay nga mangita sing pamatuod kon bala ang mga nagapangindi nga magsoldado sinsero gid. Suno sa Supreme Court, “Dapat makita sa tanan nga aspekto sang iya kabuhi . . . nga sinsero sia sa iya mga ginapatihan.” Samtang ginasabat ang pamangkot sang mga hukom, may kahigayunan ang aton kauturan nga pamatud-an nga sinsero sila sa ila pagpangindi nga mag-entra sa inaway kag magsoldado.—1 Pedro 3:15.

Sa sobra anom ka dekada, ang mga Saksi ni Jehova ginapriso sa Korea bangod nagpangindi sila nga magsoldado base sa ila ginapatihan. Ang ila halimbawa nagapamatuod nga neutral kita bilang Cristiano bangod gusto gid naton sundon ang ikaduha sa pinakaimportante nga sugo, nga ‘higugmaon ang aton isigkatawo subong sa aton kaugalingon.’—Mateo 22:39.