Bag-o lang natapos sang branch sa Spain ang pag-renovate sa isa sa mga office building sini. Ini nga building gamiton sang Translation Department. Ang pag-renovate sini nga building bahin sang mas daku nga proyekto sang branch nga naiskedyul nga matapos sa 2025.

Ini nga building may library na subong nga puede butangan sang sobra 4,000 ka libro nga reperensia sa translation. Ari man sa sini nga library ang mga libro nga wala sang digital copy.

Si Brother John Bursnall, miembro sang Branch Committee, nagsiling: “Nagbag-o gid ang ginahimo sa branch sa Spain sang nagligad nga 25 ka tuig. Sang una, ang amon branch naga-imprinta kag ginagamit bilang warehouse. Pero subong ang panguna nga ginahimo diri amo ang pag-translate sa Spanish kag sa Spanish Sign Language, lakip man ang braille transcription sa madamo nga lenguahe sa Europe. Gani, kinahanglan namon ang mas madamo nga opisina. Bangod sini nga pag-renovate, mas mabuligan namon sing mas maayo ang mga kauturan sa bilog nga kalibutan.”

Ginsugdan naman ang pag-renovate sa apat ka residence building. Asta sa 200 ka boluntaryo sa konstruksion ang magapakigbahin sa sini nga obra. Para may dayunan sila, may ginabutang subong nga 70 ka temporaryo nga mobile home sa propiedad sang branch.

Padayon ang pag-uswag sa Spain. Subong may 120,530 ka manugbantala sa sini nga pungsod. Sa sini, 23,565 ang regular pioneer. Sang nagligad nga tuig, walo ka beses nga nagtaas ang kadamuon sang mga payunir.

Nahibaluan naton nga ini nga proyekto suportahan ni Jehova para ini nga mga pasilidad magamit sa pagdayaw sang iya balaan nga ngalan.—Salmo 61:8.