Halin sang Oktubre 14 asta Disiembre 16, 2023, may isa ka bag-o nga exhibit nga may tema nga “Ginpriso Bangod sa Ila Konsiensia” nga gin-display sa isa ka prisuhan sang una nga La Modelo, kag subong isa na ka museum kag cultural center, sa Barcelona, Spain. Ang tuyo sini nga exhibit amo nga tudluan ang mga tawo, lakip ang mga opisyal sang gobierno, mga professor kag mga maestra, parte sa dalayawon nga pagtuo nga ginpakita sang pamatan-on nga mga Saksi ni Jehova nga wala nagkompromiso bangod sang ila Cristianong neutralidad.

Ginasugid sang exhibit ang istorya sang aton mga kauturan sa Spain, nga sugod sang dekada ’30, ginpriso bangod nangindi sila nga magsoldado. Sang dekada ’60 kag ’70, halos 1,000 ka utod ang napriso. Sobra 40 ang napriso sa La Modelo.

Ginpakita sa exhibit kon ngaa ang mga Saksi nangindi nga magsoldado bangod sang ila relihioso nga mga pagpati kag kon ano ang kabuhi sa prisuhan sining pamatan-on nga mga Saksi. Bangod sang kaisog nga ginpakita sining matutom nga mga utod sa madamo nga tinuig, sang 1984, nagdesisyon ang gobierno sang Spain nga may kinamatarong ang mga tawo nga mangindi sa pagsoldado bangod sang ila relihioso nga mga pagpati.

Ang professor sang history nga si Miguel Ángel Plaza, gin-imbitar nga magpamulongpulong sa opening ceremony sang exhibit. Nagpakig-istorya sia sa pila ka Saksi ni Jehova nga napriso sa La Modelo. Nagsiling sia parte sa ila eksperiensia: “Wala sing isa sa ila nga nagapakalain ukon nagkomento sing negatibo parte sa naagyan nila sa La Modelo, bisan sa mga guardia sang prisuhan. Ang kada isa sa ila nagayuhum samtang gina-istorya nila ang ila inagyan.” Ang isa nga ara sa seremonya amo si Brother Fernando Trepat, nga isa sa mga Saksi nga napriso sa La Modelo. Sia nagsiling: “Bisan subong, pagligad sang 50 ka tuig, kumbinsido ako nga nabuligan ako sang mga prinsipio sa Biblia nga makahimo sang insakto nga mga desisyon. Amo man gihapon sina nga desisyon ang himuon ko subong.”

Si Brother David Báidez, nga nag-organisar sini nga exhibit, nagsiling: “Bisan pa ini nga exhibit parte sa mga natabo sang una, amo man gihapon ang nagakatabo subong kag sa iban nga mga lugar. Subong, may ara mga 200 ka Saksi ni Jehova sa sarisari nga mga pungsod nga napriso bangod sang ila base sa Biblia nga mga pagpati.”

Ginapabaloran gid naton ang katutom kag pagbatas sang aton mga kauturan sa Spain sa madamo nga tinuig, kag padayon naton nga ipangamuyo ang mga napriso bangod sa ila pagtuo subong.—Hebreo 13:3.