Sang Abril 2, 2022, gin-release ni Brother Alberto Rovira, miembro sang Branch Comittee sa Spain ang digital format sang Bag-ong Kalibutan nga Badbad sang Balaan nga Kasulatan sa Catalan nga lenguahe. Ining espesyal nga programa natan-aw sang mga Saksi nga nagahambal sang Catalan sa Andorra kag sa madamo nga rehiyon sa Spain, lakip na ang Balearic Islands, Catalonia, kag Valencia. Natan-aw nila ini paagi sa sobra 3,000 ka koneksion sa JW Stream. Ang naimprinta nga mga kopya sang bag-o nga Biblia mangin available na sa mga kongregasyon sa masunod nga mga binulan.

Halin pa sang ika 13 nga siglo, damo na nga bersion sang Biblia sa Catalan nga lenguahe ang na-translate. Ang isa sa nami gid nga Biblia sa Catalan amo ang ginatawag nga Rhymed Bible, nga ginhimo halin sang 1282 asta sang 1325. Nagaunod ini sang 18 ka libro sa Biblia nga gin-paraphrase kag naga-rhyme, para mas madali madumduman sang mga tawo ang mga teksto.

Madamo nga mga Biblia sa Catalan nga lenguahe ang kinaraan na ang mga tinaga kag indi na maintiendihan sang mga bumalasa. Sa pila naman ka bersion gindula ang ngalan ni Jehova ukon may sala sa translation.

Amo ini ang ginsiling ni Brother Rovira sa tion sang programa: “Sigurado gid kita nga mabasa na naton sing sibu sa sini nga Biblia ang panghunahuna sang Dios sa aton mismo lenguahe.”

Nalipay gid kita nga ang mga tawo nga nagahambal sang Catalan makabenepisyo na gid sa gahom sang Pulong sang Dios.—Hebreo 4:12.