Sang Abril 26, 2023, gin-aprobahan sang gobierno sang Spain ang adjustment sa kasuguan sa buhis sini. Makabenepisyo gid sa sini ang mga Saksi ni Jehova sa Spain sa madamo nga paagi.

Bangod sini nga desisyon, indi na kinahanglan magbayad sang buhis ang aton organisasyon sa mga propiedad nga ginagamit sa pagsimba. Makabaton man sang tax deduction ang mga indibiduwal nga naga-donate para sa hilikuton sang mga Saksi ni Jehova. Dugang pa, ini nga adjustment nagakumpirmar nga ang mga Saksi ni Jehova isa ka “kilala nga relihion” base sa pagkilala sang European Court of Human Rights.

Bisan pa nga narehistro na ang mga Saksi ni Jehova sa Spain sang Hunyo 2006, wala sila ginhatagan sang tax exemption pareho sa iban nga mga relihion sa pungsod. Padayon nga nag-file sang request ang aton mga kauturan para matigayon naton ang kinamatarong nga pareho sa kinamatarong nga ginahatag sa iban nga relihion. Sa wala ginapaabot, sang Abril 24, 2023, gin-imbitar sang mga opisyal sang Ministry of the Presidency ang mga representante sang mga Saksi ni Jehova sa isa ka miting. Sa sini nga miting, ginpahibalo ang aton mga kauturan nga may himuon nga adjustment parte sa kasuguan sa buhis para sa mga nonprofit organization kag makabenepisyo sa sini ang mga Saksi ni Jehova. Pagligad sang duha ka adlaw, sang Abril 26, 2023, gin-aprobahan sang Congress of Deputies ang adjustment sa kasuguan. Ini nga pagbag-o sa kasuguan opisyal nga magasugod sa Hunyo 2023.

Nalipay gid kita sa sining importante nga desisyon nga nagahatag sang dugang nga kahilwayan sa pagsimba sa mga Saksi ni Jehova sa Spain.—Filipos 1:7.