Sang Septiembre 17, 2024, pareho ang desisyon sang tanan nga judge sang Grand Chamber of the European Court of Human Rights. Nagdesisyon sila nga dapat respetuhon ang kinamatarong sang mga pasyente nga magpili kon ano nga pagpabulong ang ila batunon base sa ila personal nga desisyon. Ining importante nga desisyon dapat gid tumanon sang Spain pati man sang 46 ka pungsod nga miembro sang Council of Europe.

Sang Hunyo 2018, ang 47 anyos nga si Sister Rosa Pindo Mulla gin-admit sa isa ka ospital sa Madrid, Spain, para sa isa ka simple nga operasyon. Antes sini, ginhatagan ni Rosa ang iya mga doktor sang iya advance health-care directive. Ginpaathag man niya nga indi sia magpatughong sang dugo bangod sa iya ginapatihan nga natun-an niya sa Biblia. (Binuhatan 15:28, 29) Ini nga mga instruksion ni Rosa ginsulat sang medical staff sa iya rekord. Pero wala kabalo si Rosa nga ginpasugtan sang isa ka judge ang iya mga doktor nga maghimo sang komplikado nga operasyon kag tughungan sia sang dugo. Pagkatapos sang iya operasyon, nakibot si Rosa nga wala gintuman sang ospital ang iya maathag nga instruksion nga indi sia pagtughungan sang dugo.

Sang ginpahibalo ang desisyon sa kaso sang Pindo Mulla v. Spain, ang tanan nga 17 ka judge nag-ugyon nga “ang adulto nga pasyente may kahilwayan nga pangindian” ang bisan ano nga paagi sang pagbulong nga indi niya gusto. Nagsiling man ang korte nga ang “isa sa pinakaimportante nga pagsulundan sa pagpabulong amo ang pagrespeto sa kahilwayan sang pasyente nga magbaton ukon mangindi sa paagi sang pagbulong.”

Nalipay gid kita sa desisyon sang korte nga suportahan ang kinamatarong ni Sister Pindo Mulla kag sang minilyon pa naton ka kauturan nga magpili sang paagi sang pagbulong nga indi kontra sa ila pagpati kag mga prinsipio.