Sang Disiembre 15, 2023, ang sigesige nga inaway sang duha ka armado nga grupo sa kapital sang Sudan nga Khartoum, naglab-ot sa ikaduha nga pinakadaku nga siudad sang pungsod, ang Wad Madani. Sa nareport na sa jw.org, sang nagsugod ang inaway sa Khartoum sang Abril 2023, madamo nga kauturan ang nalagyo pakadto sa Wad Madani, nga mga 170 ka kilometro sa southeast sang kapital. Subong, sobra 150 sini nga kauturan ang nalagyo liwat bangod sang inaway.

• Wala sang utod nga nasamaran ukon napatay

• Indi magnubo sa 158 ka kauturan ang nagbakwit. Ang pila nalagyo sa malapit nga mga siudad ukon pungsod

• 10 ka kauturan upod ang pila ka indi Saksi nila nga pamilya ang nagpabilin sa Wad Madani

• Ang mga manugtatap sang sirkito kag ang mga gulang sa sini nga lugar nagahatag sang pagpalig-on halin sa Biblia kag suporta sa mga naapektuhan

• Ang mga Disaster Relief Committee sa Sudan kag sa kaingod nga mga pungsod padayon nga nagaorganisar sang pagbulig kag nagahatag sang praktikal nga kinahanglanon, pareho sang pagkaon, bulong, kag ilistaran

Isa ka semana antes magsugod ang inaway sa Wad Madani, nag-organisar ang branch sa East Africa nga matan-aw sang mga nagbakwit ang narekord nga programa sang 2023 “Mangin Mapinasensiahon”! nga Rehiyonal nga Kombension sa Arabic nga lenguahe. Lakip sa halos 200 nga nag-attend ang 145 ka kauturan nga nalagyo bangod sang inaway sa Khartoum. Madamo sa mga nag-attend sa kombension ang nagpasalamat sa sining insakto sa tion nga espirituwal nga pagkaon nga ila nabaton. Napalig-on gid sila ilabi na sa video drama nga “Itugyan kay Jehova ang Imo Dalanon,” nga nagapakita sang sitwasyon nga pareho sa ila. Dugang pa, may pito nga nabawtismuhan sa sini nga kombension.

Ginapangamuyo naton nga padayon nga mabatas sang aton mga kauturan sa Sudan ining mabudlay nga sitwasyon kag excited kita sa tion nga ‘pauntaton na ni Jehova ang mga inaway sa bug-os nga duta.’—Salmo 46:9.