Sang Hulyo 5, 2019, ang ginrebisar nga edisyon sang Bag-ong Kalibutan nga Badbad sang Balaan nga Kasulatan sa Chinese ginpagua sa isa ka rehiyonal nga kombension sa Taoyuan City, Taiwan. Si Brother Kenneth Cook, miembro sang Nagadumala nga Hubon, amo ang nagpamulongpulong sa National Taiwan Sport University Stadium. Sa kabilugan 12,610 ang nagtambong sa sining espesyal nga okasyon, pati ang mga naka-stream sa apat ka iban pa nga kombension.

Ang Chinese nga Bag-ong Kalibutan nga Badbad Sang Cristianong Griegong Kasulatan una nga ginbalhag sang 1995 sa duha ka edisyon, ang isa sa tradisyonal nga script nga kinaandan nga ginagamit sa Hong Kong kag Taiwan, kag ang isa pa amo ang ginpasimple nga script nga ginagamit sa China, Malaysia, kag Singapore. Ang kompleto nga Bag-ong Kalibutan nga Badbad sa Chinese ginpagua sang 2001, sa duha man ka edisyon, ang isa tradisyonal kag ang isa sa ginpasimple nga edisyon. Ang ikatlo nga edisyon, nga may ginpasimple nga Chinese nga mga karakter upod sa Pinyin, ukon mga letra nga Roman alphabet, ginbalhag sang 2004.

Ang ginrebisar nga Bag-ong Kalibutan nga Badbad ginpagua man sa tatlo ka edisyon. Ang tradisyonal kag ginpasimple nga Chinese matigayon sa naimprinta kag digital nga mga pormat, samtang ang edisyon nga may Pinyin matigayon sa Watchtower ONLINE LIBRARY^™.

Ang Chinese Mandarin amo ang pinakadaku nga panguna nga lenguahe sa bilog nga kalibutan, kay ginahambal ini sang sobra 1.1 ka bilyon ka tawo. Dugang pa sa nagahambal sing Mandarin, ang Chinese nga mga karakter mabasa man sang minilyon ka tawo nga nagahambal sang lain nga lenguahe. Ang aton kauturan nga nagaalagad sa sining masangkad katama nga teritoryo may magamit na subong nga ginrebisar nga Bag-ong Kalibutan nga Badbad sa pagbulig sa mas madamo nga tawo nga makilala si Jehova kag makatigayon sing sibu nga ihibalo sa iya Pulong.—1 Timoteo 2:4.