Sa indi madugay * ipahibalo sang korte sang militar sa Tajikistan ang desisyon sini sa kaso ni Brother Rustamjon Norov. Mahimo sia prisuhon sing duha asta lima ka tuig kay nagpangindi sia nga magsoldado bangod sa konsiensia. Ginbutang sia sa pretrial detention sugod sang Oktubre 1, 2020.

Rustamjon Norov

• Natawo: 1998 (Dushanbe)

• Biograpiya: Nagapang-renovate sang mga apartment kag nagapangay-o sang mga furniture para masuportahan ang iya kaugalingon kag makabulig sa iya pamilya. Nanamian sia maghampang sing soccer

• Nabawtismuhan sia sang 2016 sang 17 anyos sia. Pagligad sang duha ka tuig, naghalin sia sa kongregasyon sang iya pamilya nga Russian ang lenguahe. Nagsaylo sia sa Tajiki nga lenguahe para buligan ang mga tawo sa sini nga lenguahe nga matun-an ang Biblia

Sang 2016, si Brother Rustamjon Norov boluntaryo nga nagreport sa military office para ipaathag ang iya neutral nga panindugan kag nagpangabay nga magahimo sia sing alternative civilian service. Pagkasunod nga tuig, nagreport naman sia liwat. Ang isa ka deputy commander nagdayaw gid sa paathag ni Brother Norov kag ginrespeto sia sini. Gani sa nagsunod nga tatlo ka tuig, wala sia ginpatawag para magsoldado.

Pero sang Septiembre 24, 2020, ginpatawag si Brother Norov sang district military office. Tatlo ka oras sia nga ginkuestyon sang mga opisyal didto, kag suno sa ila masarangan niya nga magsoldado. Ginpuersa man sia sang mga opisyal nga magpa-check-up sa doktor. Sini nga tion, ara man ang tatay ni Brother Norov kag ginpangabay sini ang mga opisyal nga ipasa ang kaso sang iya bata sa opisina sang piskal para marebyu ini.

Si Brother Norov kag ang iya tatay nagreport sa opisina sang piskal sang Oktubre 1. Ginpaupdan sila sang piskal sa isa ka pulis pakadto sa district military office. Pag-abot nila didto, wala ginpasulod ang tatay ni Brother Norov. Ginpriso nila si Brother Norov sing duha ka adlaw, bisan wala sing kaso ukon krimen nga pormal nga ginpasaka batok sa iya. Wala man sia ginpasugtan sang mga opisyal nga makaistorya sa iya abogado.

Sang Oktubre 3, si Brother Norov ginsaylo sa isa ka military unit sa siudad sang Khujand, nga mga 300 kilometros ang kalayuon halin sa Dushanbe, nga ginaistaran sang iya pamilya. Sa nagsunod nga duha ka adlaw, ginsaylosaylo sia sa sarisari nga mga military unit sa Khujand.

Sang Oktubre 6, gintugutan na si Brother Norov nga magtawag sa iya pamilya kag mabisitahan sang iya abogado. Pero sang Oktubre 17, ang korte sang militar nagmando nga ibutang sia sa pretrial detention. Matener sia diri samtang padayon ang pag-imbestigar sa iya kaso kag asta nga makadesisyon ang korte. Ginkasuhan si Brother Norov nga gindaya niya ang iya medical record para indi sia makasoldado.

Bisan pa ara sia sa pretrial detention, positibo gihapon si Brother Norov kag bug-os ang iya pagsalig kay Jehova. Nagapasalamat gid sia nga sa bulig ni Jehova, napabakod niya ang iya pagtuo kag kaisog nga amo gid ang kinahanglan niya para maatubang ini nga pagtilaw. Nagpasalamat man sia nga naagyan niya ang isa ka wala ginapaabot nga pagtilaw sang 2013. Sina nga tuig, si Brother Norov kag ang iya manghod nga lalaki nga si Ravshan, puersa nga ginkuha sang mga awtoridad sa ila eskwelahan kag gindala sa military office para ma-check-up sang doktor. Si Rustamjon, nga 15 anyos pa lang sina nga tion kag wala pa sa edad para magsoldado, isa ka di-bawtismado nga manugbantala. Pagkatapos sini nga insidente, ang ila tatay nga si Batyr, naghinguyang sing mas madamo nga tion sa ila pangpamilya nga pagsimba para buligan ang iya duha ka bata nga matun-an kon paano pangapinan ang ila neutralidad bilang mga Cristiano. Regular nga ginahimo ni Batyr nga sia kuno abi ang opisyal sang militar, kag praktison sang iya duha ka bata sa iya kon paano pangapinan ang ila pagtuo.

Si Rustamjon nagsiling: “Sang wala pa kami nagapraktis sa amon pangpamilya nga pagsimba, abi ko ’sarangan ko na gid nga pangapinan ang akon pagtuo. Pero sang nagapraktis na kami, wala ’ko nag-expect nga grabe ang akon kulba. Nag-athag sa akon nga kinahanglan ko gid ipangamuyo nga dugangan ang akon pagtuo, kag kinahanglan ko man tun-an sing dugang pa ang parte sa akon desisyon nga mangin neutral. Bangod sini, amat-amat nga nadula ang akon kahadlok. Sang una nga mga binulan sang 2016, gindedikar ko ang akon kaugalingon kay Jehova kag nagpabawtismo.”

Napalig-on man si Rustamjon sang iya pagpakig-upod sa may edad kag hamtong nga mga brother nga napriso bangod sa ila pagtuo. Nagsiling sia: “Maathag sa akon nga puede ko gid maeksperiensiahan ang mga kabudlayan bangod neutral ako. Kon mapriso gid man ako, mangin kadungganan para sa akon nga pakabalaanon ang ngalan ni Jehova sa ‘bag-o nga teritoryo.’

“Ang amon pamilya,” siling sang tatay ni Rustamjon, “nagapasalamat gid kay Jehova sa daku nga kadungganan nga himuon ang iya kabubut-on kag mangin instrumento sa iya mahigugmaon nga mga kamot. Sa amon mga kauturan, gusto namon ihambal nga ‘nabatyagan gid namon ang inyo pagpalangga, mga pangamuyo, kag suporta nga amo gid ang nakabulig sa amon nga mangin kalmado kag malapit kay Jehova.’ Wala kami nagakabalaka. Ang amon mga tagipusuon puno sang paghidait sang Dios, suno gid sa ginapasalig ni Jehova sa aton sa iya Pulong!”—Filipos 4:6, 7.