Sang Septiembre 7, 2022, ang United Nations Human Rights Committee (CCPR) nagpagua sang importante nga desisyon parte sa indi maayo nga pagtrato sang Tajikistan sa mga Saksi ni Jehova. Sang Hulyo 7, 2022, ang CCPR nagdesisyon pabor sa mga Saksi ni Jehova sa kaso nga Adyrkhayev v. Tajikistan. Ini nga kaso parte sa pagpangindi sang Tajikistan nga kilalahon ang mga Saksi ni Jehova kag sa pag-ban sini sa ila mga hilikuton.

Ginahimo sang mga Saksi ni Jehova ang ila pagsimba sa Tajikistan sa sulod na sang sobra 50 ka tuig. Ang Religious Association of Jehovah’s Witnesses (RAJW) ginrehistro sang 1994. Pero sang Oktubre 11, 2007, gin-cancel sang Ministry of Culture ini nga rehistro kag gin-ban ang pagsimba sang mga Saksi ni Jehova. Nagsiling ang gobierno nga ang pagbantala sang mga Saksi ni Jehova, ang ila pagpangindi nga magsoldado, kag ang ila pagpati nga sila ang matuod nga relihion nagapamatuod nga extremist ang ila hilikuton. Pila ka beses na nila nga gintinguhaan nga iparehistro liwat ang RAJW pero wala ini gin-aprobahan.

Sa sining ulihi nga desisyon, ang CCPR nagsiling nga ilegal ang pag-ban sang Tajikistan sa mga Saksi ni Jehova. Nagsiling ini nga indi makatarunganon ang “tanan nga rason” nga ginhatag sang Tajikistan kon ngaa gina-ban ang RAJW kag kon ngaa wala ini ginrehistro liwat.

Nagsiling man ang CCPR nga bangod wala ginrehistro liwat sang gobierno sang Tajikistan ang RAJW nagresulta ini sa “pagpang-aresto, pag-detain, pagpang-interogar, pagpang-raid, pagpangkastigo, pagkompiskar sang relihioso nga mga materyal, kag pag-deport sa [isa sa] mga Saksi ni Jehova.” Bangod sini nga pagmaltrato, ang CCPR nagsiling nga ginlapas ang mga kinamatarong sang mga Saksi ni Jehova nga ginaproteksionan sang United Nations International Covenant on Civil and Political Rights.

Ginmanduan sang CCPR ang Tajikistan nga binagbinagon ang parte sa pagrehistro liwat sa mga Saksi ni Jehova kag bayaran sing danyos ang mga Saksi nga nalapas ang kinamatarong. Nagmando man ini nga ang gobierno sang Tajikistan “obligado gid nga maghimo sang tanan nga paagi para indi na masulit sa ulihi ining paglapas sang kinamatarong sang isa.”

Ginapaabot nga ang desisyon sang CCPR may epekto sa kaso sang 71 anyos nga si Brother Shamil Khakimov, nga ginpriso halin pa sang Pebrero 2019 bangod lamang sa paghimo sang mga hilikuton sang iya relihion. Ang legal lang nga rason sa pag-aresto kag pagpriso sa iya sang mga awtoridad amo lamang ang pag-ban sa mga Saksi ni Jehova.

Nagalaum kita nga ang desisyon sang CCPR magaresulta sa kahilwayan sa pagsimba sa mga Saksi ni Jehova sa Tajikistan. Ginapangamuyo naton nga pakamaayuhon ni Jehova ang aton padayon nga mga panikasog sa “pagpangapin kag legal nga pagpamatuod sa maayong balita.”—Filipos 1:7.