Sang Mayo 16, 2023, ginpagua sa prisuhan sa Tajikistan si Brother Shamil Khakimov. Nakapauli na sia pagkatapos sang sobra apat ka tuig nga pagkapriso bangod sang iya pagtuo.

Antes pa sang pag-aresto sa iya sang 2019, si Shamil may high blood na, sakit sa tagipusuon, kag iban pa nga balatian. Bisan pa madamo sing ginabatyag si Shamil, wala sia napabulong sing maayo sang ara sia sa prisuhan. Bangod sini, naglala pa gid ang iya kondisyon, kag natubuan pa sia gani sang gangrena sa iya batiis kag tiil.

Bisan pa nga sang iya grabe nga pag-antos kag kabudlayan sa prisuhan, padayon nga nangin positibo si Shamil paagi sa pagpamensar pirme sang pila ka teksto sa Pulong sang Dios.

Sa iya mga pangamuyo, pirme ginasambit ni Shamil ang mga tinaga sa Salmo 141:8: “Nagasalig ako sa imo, O Soberanong Ginuong Jehova. Nagadangop ako sa imo.” Dugang pa, napaumpawan man sia sang ginbasa niya ang Isaias 49:13, 16, nga nagasiling nga ang mga ngalan sang iya mga alagad nga nagaantos daw pareho lang nga “gintigib” sa palad ni Jehova. Ini nga mga tinaga nagpasalig kay Shamil nga bisan pa napriso sia, indi sia pagkalimtan ni Jehova.

Bangod sa paumpaw nga nabaton ni Shamil sa Pulong ni Jehova, nakapabilin sia nga malipayon kag napalig-on pa niya ang iban. Ang isa ka brother nga pirme nagakontak kay Shamil sang ara sia sa prisuhan nagsiling: “Sa una nga bes nga gintawgan ko sia, ginapaabot ko nga masubo sia. Pero mabakod gid ang iya pagtuo. Padayon sia nga nangin positibo sa bisan ano nga sitwasyon, kag pirme niya kami ginapalig-on.”

Ang Panalambiton 3:25 nagasiling: “Si Jehova maayo sa tawo nga nagalaum sa iya, sa tawo nga padayon nga nagapangita sa iya.” Ginapangamuyo naton nga si Jehova padayon nga mangin “maayo” kay Shamil kag sa iban pa nga mga kauturan nga malipayon nga nagabatas sa Tajikistan.