“Ginbuligan ako ni Jehova nga padayon nga mangin matutom,” siling ni Brother Jovidon Bobojonov sa tapos sia ginpagua sa prisuhan sang Nobiembre 1, 2020. Sang adlaw antes sina nga petsa, ginhatagan sang presidente sing pardon si Jovidon kag ang 377 pa ka iban nga priso. Si Jovidon ginsentensiahan nga mapriso sing duha ka tuig kay nagpangindi sia nga magsoldado bangod sa iya konsiensia, kag siam ka bulan na sia sa prisuhan.

Sang Oktubre 4, 2019, puersa nga gindakop sa iya balay si Jovidon, nga 19 anyos sina nga tion, sang mga opisyal sang militar kag ginpriso nila sia sa enlistment office. Sa nagsunod nga mga binulan, ginsaylosaylo sia sa sarisari nga mga military unit. Sa kada Temporary Detention Facility (TDF) nga ginadal-an sa iya, dapat niya ipaathag kon ngaa indi sia magsoldado. “Ginapamangkot ako sang mga kumander kag mga soldado sang wala sing pulos nga mga pamangkot, kag gusto nila tanan nga talikdan ko ang akon relihion,” siling ni Jovidon. “Gusto nila nga manginit ako sa ila mga pamangkot. Kon kis-a ginapukaw nila ako sa tungang-gab-i kag sulitsulit nga ginapamangkot sang amo gihapon nga mga pamangkot, kag ginapuersa nila ako nga ipaathag kon ngaa indi ako magsoldado.

“Pero nakabulig gid ang pangamuyo. Sa military unit, adlaw-gab-i ako nga nagapangamuyo sing hugot samtang nagahibi, nga nagapangabay kay Jehova nga buligan ako nga makabatas para indi ko sia mapakahuy-an, kag indi magpanginit kon ginapaakig ako.

“Daw pareho lang nga ginauyatan ako ni Jehova sa kamot . . . Kon kis-a gina-depress ako bangod sa kasubo. Pero ginapabakod ako ni Jehova paagi sa iya mga tinuga. Kada bugtaw ko kon aga, mabatian ko ang huni sang mga pispis nga nagakanta. Kon gab-i naman, makita ko ang bulan kag ang mga bituon. Regalo ini halin kay Jehova nga nagapalipay kag nagapabakod sa akon.”

Si Jovidon ginpamatbatan nga guilty sang Abril 2, 2020, kag ginsaylo sia halin sa TDF pakadto sa isa ka prisuhan. Wala sia ginpasugtan nga makabaton sing sulat. Pero, ginadul-ungan sia sing pagkaon sang mga kauturan kag ginasulat nila ang daily text sa mga grocery bag. “Nakabulig ini sa akon nga indi masubuan kag nabatyagan ko nga palangga gid ako sang akon mga abyan,” siling ni Jovidon.

Nagapasalamat man si Jovidon nga madumduman niya ang makapalig-on nga mga teksto sa Biblia, pareho sang Roma 8:37-39. Sia nagsiling: “Sang sa prisuhan ako, nabatyagan ko gid nga tuod ini nga teksto. Wala sing bisan ano nga pagtilaw nga makapugong sa pagpalangga ni Jehova sa akon. Ginbuligan gid ako ni Jehova nga padayon nga mangin matutom.”

Ang eksperiensia ni Jovidon nagpabakod sa iya mga ginikanan. Ang iya tatay nga si Abdujamol, nagsiling: “Ang amon pagtuo ginpabakod sang mga pangamuyo kag sang maayo nga halimbawa sang amon bata, nga nagpabilin nga matutom sa sini nga pagtilaw. Grabe man ang pagsuporta sang mga kauturan halin sa bilog nga kalibutan. Ginapasalamatan gid namon ang ila mga pangamuyo. Ginapasalamatan man namon si Jehova kay ginhatagan niya kami sang mga abyan nga nagapalangga kag nagaulikid sa amon.”

Sa sining tion sang katapusan, ginapaabot gid naton tanan nga makaagi kita sang “nagahingalayo nga mga pagtilaw.” (1 Pedro 4:12) Gani, si Jovidon nagsiling: “Subong nga hilway na ako, gusto ko nga gamiton ini nga kahilwayan para magtuon sing dugang pa parte kay Jehova kag handaan sing maayo ang mga pagtilaw nga magaabot. Para sa mga wala pa makaagi sining grabe nga mga pagtilaw, importante gid nga gamiton ninyo sing bug-os ang inyo kahilwayan sa pagtuon sing dugang pa parte kay Jehova paagi sa pagbasa sang iya Pulong kag sang aton mga publikasyon.”