Sa Mierkoles, Abril 1, 2020, ipahibalo sang military court sa Dushanbe, ang kapital nga siudad sang Tajikistan, ang desisyon sini sa kaso ni Brother Jovidon Bobojonov bangod sa iya pagpangindi nga magsoldado. Sobra na lima ka bulan nga napriso kag ara sa mabudlay nga kahimtangan si Brother Bobojonov samtang nagahulat sang desisyon sa iya kaso.

Sang Oktubre 4, 2019, ang 19 anyos nga si Brother Bobojonov puersa nga gindakop sa iya balay sang mga opisyal sang militar sa siudad sang Khujand. Gindala nila sia sa enlistment office kag ginpriso didto. Pagligad sang duha ka adlaw, ginpuersa sia nga magsakay sa tren kag gindala sa isa ka military training center sa Lenin District. Sang ulihi, ginsaylo sia sa military unit No. 45075 sa diin gintinguhaan sang mga opisyal nga pasuksukon sia sang uniporme sang militar kag pasumpaon sang oath of allegiance. Sang Enero 28, 2020, ginpasakaan sia sing kaso kriminal.

Ang mga ginikanan ni Jovidon, nga mga Saksi ni Jehova man, nagpasaka sang reklamo sa madamo nga opisyal sa Tajikistan, pati na sa Presidential Administration kag sa Ombudsman Office. Ang mga awtoridad nagsiling nga bangod wala pa sing kasuguan parte sa alternative service, ang ginhimo ni Brother Bobojonov isa ka krimen gani indi sala nga dakpon sia.

Kabalo kita nga padyaan ni Jehova ang maisog nga panindugan ni Brother Bobojonov paagi sa paghatag sa iya kag sa iya pamilya sing kabakod kag paghidait.—Salmo 29:11.