Suno sa ginreport sang nagligad, sang Septiembre 21, 2021, temprano nga ginpagua sa prisuhan sa Tajikistan ang 22 anyos nga si Brother Rustamjon Norov. Ginpagua sia bangod sa bag-o nga kasuguan nga ginpatuman sina nga bulan. Tatlo ka bulan sia nga nagtener sa mga pretrial detention center. Sang Mayo 10, 2021, ginsaylo sia sa isa ka correctional facility sa Yavan para padayunon ang iya sentensia nga tatlo ka tuig kag tunga nga pagkapriso. Sugod sang gin-detain sia, asta nga gin-hearing ang iya kaso kag ginpriso sia, nagdayaw gid ang mga nakakita kay Rustamjon sa iya maayo nga paggawi kag integridad.

Isa ka bes, sa tion nga gina-hearing ang kaso ni Rustamjon, ginpalapitan sia sang isa ka koronel para pangamustahon. Nagsiling ang koronel nga nagdayaw gid sia sa panindugan, kaisog, kag pagkakalmado ni Rustamjon. Nagsiling sia: “Ang tanan nga nagapati sa Dios dapat pareho sa imo.” Nagsiling pa sia: “Imadyina nga mga tinuig sugod subong, kon pasugtan na sang kasuguan sang Tajikistan ang alternative service, isa gid ang imo ngalan nga malakip sa listahan sang mga nagsakripisyo para matigayon sang mga pumuluyo ina nga kinamatarong.”

Sang ara sa prisuhan si Rustamjon padayon niya nga ginpakita ang maayo nga paggawi kag nangin panaksi gid ini sa iban. Bangod sang iya maayo nga paggawi, gin-agda sia sang mga opisyal sang prisuhan nga makigbahin sa isa ka pinasahi nga training. Ang sponsor sini nga training amo ang European Union. Ginhimo nila ini nga training para buligan ang mga priso nga makakita sang obra kon makagua na sila sa prisuhan. Sang natapos ang training, ginhatagan sang administrasyon sang prisuhan si Rustamjon sang isa ka certificate kag sang sulat para pasalamatan sia sa iya kapisan. Si Rustamjon nagsiling nga suno sa mga awtoridad maayo ang iya paggawi bangod ginaaplikar niya ang mga prinsipio sang Biblia.

Antes sia makagua sa prisuhan, nagaduhaduha si Rustamjon kon bala makabenepisyo sia sa bag-o nga kasuguan sang Tajikistan. Pero ginpasalig sia sang mga kaupod niya sa prisuhan nga makagua sia bangod maayo ang ginpakita niya nga paggawi sa prisuhan. Ginpalig-on man sia sang mga opisyal sang prisuhan.

Pareho kay Rustamjon, ang mga pamatan-on nga Saksi nga ginpriso bangod nagpabilin sila nga neutral kag malig-on sa ila pagtuo, ‘nagpaiwag gid sang ila kapawa sa atubangan sang mga tawo.’ Pero ang pinakaimportante, ining “maayong mga buhat” nagadayaw kag nagapadungog kay Jehova nga Dios.—Mateo 5:16.