Sang Disiembre 14, 2021, ang United Nations Human Rights Committee nagdesisyon nga ginlapas sang Tajikistan ang kinamatarong ni Brother Tierri Amedzro sang gin-aresto sia kag gin-deport sa Kazakhstan.

Nagdesisyon ang komite nga ang pag-aresto “indi makatarunganon” kag ginlapas sini ang International Covenant of Civil and Political Rights sang UN. Nagsiling man ang komite nga indi mapunggan sang gobierno si Tierri kon gusto niya nga magbalik sa Tajikistan. Subong, ang mga opisyal sa Tajikistan “obligado gid nga maghimo sang tanan nga paagi para indi na masulit sa ulihi ining paglapas sang kinamatarong sang isa.”

Gin-raid sang mga awtoridad sa Tajikistan ang isa ka balay sang mga Saksi ni Jehova nga ginhiwatan sang miting sang Oktubre 4, 2018. Gin-aresto si Tierri kag gin-interogar sia sa headquarter sang Tajikistan State Committee on National Security. Sang Oktubre 16, 2018, ginsentensiahan sang isa ka judge nga guilty si Tierri base sa indi matuod nga panumbungon nga nag-migrate sia nga wala sing legal nga pahanugot. Si Tierri pumuluyo sang Russia nga nagaobra sa Tajikistan.

Ginmultahan sang judge si Tierri kag sang ulihi ginpa-deport sia sa Kazakhstan.

“Nagalaum ako nga ang desisyon sang komite sang UN makabulig bisan paano sa kahilwayan sang relihion sa Tajikistan, kag ang aton mga kauturan didto makasimba kay Jehova nga wala sing tublag,” siling ni Tierri.

Subong, may isa ka brother nga napriso sa Tajikistan bangod sang iya pagtuo.

Nagasalig kita nga hatagan ni Jehova sing dayon nga paghidait ang aton mga kauturan nga nagabatas sang mga pagtilaw.—Isaias 26:3.