Sang 2019, ginsugdan ang konstruksion kag pag-renovate sa Thailand branch sa bulig sang lokal kag internasyonal nga mga volunteer. Pero, sang nagsugod ang COVID-19 nga pandemic, 8 lang sa 50 ka international construction nga mga volunteer ang wala nagpauli sa ila mga pungsod. Samtang ginakuha ang mga restriksion, nagpadayon ang obra. Gin-agda ang dugang nga lokal nga mga volunteer para hanason kag magbulig nga matapos ang proyekto. Nakompleto ang proyekto sang Abril 30, 2023.

Si Brother Setthasat Tawansirikul kag ang iya asawa nga si Waraporn, nalakip sa lokal nga mga volunteer. Sa umpisa, nabalaka sila bangod wala sila sing eksperiensia sa konstruksion. Si Setthasat nagsiling: “Sang nakaabot na kami didto, nakabaton kami sang maayo gid nga paghanas.”

Ang daku nga kalipay sa pag-obra sa sini nga proyekto nagpalig-on gid sa madamo nga lokal nga mga volunteer nga mag-aplay pa sa iban nga klase sang bug-os tion nga pag-alagad. Ang pila sa ila naga-volunteer na sa mga construction project sa bilog nga teritoryo sang branch sa Thailand. Ang isa ka sister nagaeskwela sa School for Kingdom Evangelizers. Ang iban nagaalagad na subong sa Bethel. Ang isa sa sining bag-o nga mga miembro sang pamilya Bethel, si Brother Rapeepat Woradetsakul, nagsiling: “Naeksperiensiahan ko ang bulig ni Jehova sa construction project, gani naghatag ini sa akon sing kaisog nga mangin handa sa pagbaton sang asaynment sa Bethel. Sigurado ako nga buligan gid ako ni Jehova sa sining bag-o nga asaynment.”

Ang konstruksion kag pag-renovate sang branch sa Thailand naglakip sang pag-renovate sang mga residence kag mga opisina, pagtukod sang bag-o nga maintenance kag storage nga bilding, kag sang bag-o nga parking area. Dugang pa, anom ka apartment nga malapit sa branch office ang ginbakal kag gin-renovate para idugang sa dalayunan sang pamilya Bethel.

Nalipay kita para sa aton mga kauturan sa Thailand bangod handa gid sila nga mag-alagad kay Jehova kag naeksperiensiahan nila nga matuod ang ginasiling sang Salmo 34:8: “Tilawi ninyo kag tan-awa nga si Jehova maayo.”