Ang ika-22 nga Bangkok International Book Fair ginhiwat sa Bangkok, Thailand, halin sang Marso 28 asta Abril 8, 2024. Ginhiwat ini sa Queen Sirikit National Convention Center kag mga duha ka milyon ka tawo ang nagkadto sa sini nga book fair. Ang mga utod nagplastar sang isa ka booth para mapakita kon paano ang mga laygay sa Biblia makabulig nga mangin maayo ang mental health kag mabuhinan ang stress sang mga tawo. Ang mga utod nga nag-volunteer sa booth nakapakig-istorya sa madamo nga tawo kag may 34 nga nagpangabay sang Bible study.

Sa isa ka pag-istoryahanay, may lalaki nga nagsiling nga ang iya bata nga babayi nagaantos sa grabe nga depresyon. Ginbasa sang mga utod ang pila ka teksto nga makita sa Ang Lalantawan Num. 1 2023, “Mental Health​—Kon Paano Makabulig ang Biblia.” Ginbuligan man sang mga utod ini nga lalaki nga mangita sang iban pa nga impormasyon parte sa kon paano mangin malipayon ang pamilya sa jw.org. Nagapasalamat gid sia sa praktikal nga laygay halin sa Biblia kag nagsiling sia nga isugid niya ini dayon sa iya bata nga babayi.

Ang isa ka mataas nga opisyal sang gobierno nagbisita sa aton nga booth kag nakaistoryahanay sila sing malawig sang isa naton ka utod. Pagkatapos niya matan-aw ang pila ka video sa jw.org, namangkot ang opisyal parte sa mga Saksi ni Jehova kag sa aton ginahimo nga pagtudlo parte sa Biblia. Natalupangdan niya dayon ang sign nga libre nga pagtuon sa Biblia. Namangkot ang opisyal, “Ano ang kinahanglan para maka-Bible study?” Ginpakita dayon sang brother ang brosyur nga Magkabuhi sing Wala Katapusan! kag ginpakita kon paano ginahimo ang interactive nga pagtuon sa Biblia. Naghimo sang iskedyul ang mga brother para makapakig-istorya liwat sa iya.

Sa tapos mapakita sang isa ka sister ang aton website sa isa ka babayi kag ginpaathag ang aton pagbantala nga hilikuton, namangkot ang babayi: “Ano pa gid ang iban ninyo nga ginahimo?” Ginpatan-aw sang sister ang video nga Ano ang Ginahimo sa Kingdom Hall? Gintan-aw gid sang maayo sang babayi ang video. Dayon nagsiling sia: “Daw kabuot kag kamainabyanon sang mga tawo sa inyo mga miting! Gusto ko gid maka-attend.” Pagkasunod nga semana, halos duha ka oras nga nagbiyahe ang babayi para maka-attend sa miting.

Nagapasalamat gid kita sa aton mga kauturan sa Bangkok nga naggamit sang ila tion para buligan ang iban nga makatuon parte sa “paghidait sang Dios nga labaw sa tanan nga paghangop.”—Filipos 4:7.