Sugod sang Disiembre 1, 2019, asta Enero 31, 2020, ang mga kauturan sa Thai nga mga kongregasyon kag grupo halin sa 11 ka pungsod nagkadto sa Thailand para mag-upod sa pinasahi nga kampanya sa pagbantala. Katuyuan sini nga kampanya nga buligan ang mga 4,800 ka manugbantala nga nagahambal sang Thai sa Thailand nga mabantalaan ang mga tawo nga nagahambal sang Thai sa kapital nga siudad sang Bangkok kag sa palibot sini. Ang sobra 600 ka manugbantala nga nag-upod sa sini nga kampanya naghinguyang sang 34,625 ka oras sa ministeryo, nakahatag sang 32,718 ka literatura, nakapatan-aw sang 6,637 ka video, kag nakasugod sang 310 ka pagtuon sa Biblia.

Amo ini ang ikaduha nga kampanya sa pagbantala sa Thailand sa nagligad nga duha ka tuig. Pagkatapos sang una nga kampanya, nga nagsugod sang Disiembre 2018 asta Enero 2019, si Brother Plakorn Pestanyee, nga miembro sang Komite sang Sanga sa Thailand, nagreport: “Nakibot gid kami sang kadamuon sang nagpa-Bible study kag sang positibo nga epekto sini sa mga kongregasyon.” Bangod sining maayo gid nga resulta, nag-organisar ang branch sang ikaduha nga kampanya.

Sa ikaduha nga kampanya, ang pila ka manugbantala halin sa iban nga pungsod wala dayon nagpauli para mas madamo pa ang ila mabuligan nga makatuon parte kay Jehova. Ang isa ka mag-asawa nga taga-Korea nagtener sa Thailand sang isa ka bulan. Damo sila sang nakita nga interesado, gani gindugangan pa gid nila sing duha ka semana ang ila pagtener. Ang isa pa ka sister nga halin sa Korea, nga nag-resign sa iya obra para makaupod sa kampanya, nagdesisyon nga magsaylo sa Thailand.

Ang panikasog sang mga manugbantala sa sini nga kampanya may maayo gid nga resulta. Duha ka Saksi, ang iloy kag ang iya bata nga babayi, ang nakaistorya sa isa ka babayi sa ginaubrahan sini. Sa ila una nga pag-istoryahanay, ginbilinan nila ang babayi sang Magmata! Num. 2, 2019, nga may tig-ulo nga “Anom ka Leksion nga Dapat Matun-an sang Kabataan.” Pagbalik sang mga sister, malipayon sila nga gin-abiabi sang babayi samtang nagauyat sang magasin nga Magmata! nga ginbilin nila sa iya. Ang babayi nagsiling: “Kanami gid sini! Gusto ko makahibalo sing dugang pa.” Gin-iskedyul sang mga sister nga balikan ang babayi kada semana kon tigpalanyaga para tun-an sia sa Biblia. Ginbuligan man nila sia nga ma-download ang JW Library app. Subong, padayon sia nga nagatuon sing duha ka beses kada semana kag ginapatan-aw niya sa iya kabataan ang mga video, pareho sang whiteboard animation.

Gin-istorya man sang isa ka manugbantala ang isa ka babayi nga nagdayaw gid bangod sa maayo nga pamayo kag pagkamainabyanon sang mga Saksi. Nagsiling ang babayi nga madamo na sia sang simbahan nga ginkadtuan para mangita sang mga abyan pero wala gid sia sang nakita. Gin-agda sia sang manugbantala nga magtambong sa miting sina mismo nga adlaw. Gani nagtambong ang babayi, kag nalipay gid sia sa mga kauturan nga may sarisari nga kultura kag gindak-an. Nagtuon sia sang Biblia gamit ang brosyur nga Maayong Balita Halin sa Dios! kag gusto niya magpadayon sa pagtambong sa mga miting.

May naistorya man ang isa ka sister nga isa ka babayi nga mga singkwentahon na ang edad sa Bang Na, nga isa sa mga distrito sa Bangkok. Ang babayi nagsiling nga nagakadto sia sa simbahan sang una pero wala sia sang Biblia. Ginbuligan sia sang sister nga ma-download ang JW Library app kag ang Bag-ong Kalibutan nga Badbad sang Balaan nga Kasulatan. Sang ginbalikan sia sang mga manugbantala, ginsugiran sila sang babayi nga ginabasa niya ang Biblia sa app nga ila gin-download. Ginpakita sang mga sister sa babayi ang mga pamangkot sa likod sang Maayong Balita nga brosyur kag isaisa nila nga ginbasa ini sa iya. Nagsiling ang babayi nga gusto gid niya mabal-an ang sabat sa sina tanan. Gani ginsugdan sang mga sister ang pagtuon sa Biblia, kag ginapadayon ini subong sang isa ka sister didto. Nagsiling ang babayi nga nanamian gid sia sa iya pagtuon kay subong pa lang niya nahimo nga sia mismo ang ga-research kag gatuon parte sa Dios kag sa Biblia.

Sang nagapamalaybalay ang isa ka sister, naistorya niya ang isa ka lalaki nga Thai kag ang iya asawa nga Laotian. Ginpamangkot sila sang sister kon ano ang pinakaimportante para sa ila. “Pamilya,” sabat nila. Dayon ginpakita sang sister ang impormasyon parte sa pamilya sa brosyur nga Maayong Balita Halin sa Dios! Nakita sang mag-asawa nga praktikal ang laygay sini, gani nagpasugot sila nga magtuon sa Biblia. Wala magdugay, nagtambong sila sa miting sa kongregasyon. Nanamian gid sila sa miting kay mainabyanon gid ang tanan, amo nga gusto nila magtambong pirme.

Ginapakita sini nga mga eksperiensia kag sang iban pa parte sa kampanya sa pagbantala sa Thailand nga sa sining katapusan nga mga adlaw, ang katawhan ni Jehova “madamo pirme sing ginahimo sa hilikuton sang Ginuo.”—1 Corinto 15:58.