Sang Marso 12, 2023, gin-release ni Brother Wilfrid Sohinto, miembro sang Branch Committee sa Benin, ang Bag-ong Kalibutan nga Badbad sang Balaan nga Kasulatan sa Kabiye nga lenguahe. Ini nga pag-release ginhimo paagi sa live nga programa sa Kara, Togo. Sobra 2,959 ka tawo ang nag-attend sa sini. a Pagkatapos sini nga release, ginpanagtag na dayon ang naimprinta nga kopya sa mga nag-attend sa sini nga miting kag puede na man ma-download ang digital nga kopya sini nga Biblia.

Ang kalabanan nga tawo nga nagahambal sang Kabiye nagaistar sa northern Togo. Ginahambal man ini sang kaingod nga mga pungsod nga Benin kag Ghana. Mga isa ka milyon ka tawo ang nagahambal sini nga lenguahe.

May iban man nga Biblia sa Kabiye nga lenguahe, pero ang Bag-ong Kalibutan nga Badbad sang Balaan nga Kasulatan amo ang una nga Biblia nga naggamit pirme sang ngalan sang Dios. Ang isa ka Biblia sa sini nga lenguahe naggamit man sang ngalan sang Dios, pero mabasa lang ini sa Exodo 3:15.

Parte sa pag-release sining Bag-ong Kalibutan nga Badbad sang Balaan nga Kasulatan, ang isa ka translator nagsiling: “Maathag gid nga ginasuportahan ni Jehova ini nga proyekto para matigayon namon ini nga Biblia. Makabulig gid ini sa amon pagministeryo kag makalilipay gid ini nga gamiton sa mga miting sa kongregasyon.”

Nagakalipay kita upod sa mga kauturan naton nga nagahambal sang Kabiye sa sining importante nga regalo nga makabulig sa ila nga ‘dayawon ang ngalan ni Jehova.’—Salmo 135:1.