Bangod sang mabaskog kag sigesige nga pag-ulan sa Togo sang tingulan sang 2019, nagbaha sa pila ka bahin sang siudad sang Lomé, Togo. Gani naapektuhan ang 257 ka manugbantala halin sa 7 ka kongregasyon. May ginaorganisar na nga bulig para sa mga naapektuhan.

Sa pila ka lugar, nagdalom sing isa ka metro ang tubig sa sulod sang mga bilding, gani 51 sa aton mga kauturan ang nagbakwit. Nagdayon sila anay sa iban nga kauturan nga wala ginbahaan.

Bangod sa baha, naghigko ang pila sa ila ginakuhaan sang tubig sa sina nga lugar. Gani ang Komite sang Sanga sa Benin, nga amo ang nagadumala sang hilikuton sa Togo, nagpadala sang kinahanglanon nga suplay paagi sa manugtatap sang sirkito kag lokal nga mga gulang. Lakip sa mga suplay ang mga tableta para magtinlo ang tubig, disinfectant, kag bleach.

Ginapangamuyo naton nga pakamaayuhon ni Jehova ang aton mga kauturan sa Togo samtang ginapakita nila ang nagasakripisyo nga gugma sa isa kag isa.—Juan 13:34, 35.