Si Brother Eziz Atabayev ginpriso sa Turkmenistan kay nangindi sia nga magsoldado bangod sa konsiensia. Matutom sia nga nagbatas sa prisuhan sa sulod sang duha ka tuig. Ginpagua sia sang Disiembre 19, 2020. Sa nagligad nga pulo ka tuig, 46 na ka brother ang ginpriso sa sini nga pungsod kay nangindi sila nga magsoldado bangod sa konsiensia.

Sang 2016, ginpatawag sang gobierno si Brother Atabayev para magsoldado. Pero nagpangindi sia, gani ang iya kaso ginsaylo sa prosecutor’s office sa ila siudad. Pagkatapos sang halos duha ka tuig, ginpatawag sia para mag-atubang sa korte. Sang Disiembre 19, 2018, ginsentensiahan sia sang korte nga mapriso sing duha ka tuig.

Si Eziz nagsiling: “Antes ako napriso, pirme ako nagaistorya sa iban nga brother nga nakaagi man atubang sa korte ukon sa mga brother nga nakaagi na priso. Ginsugiran nila ako kon ano ang nagakatabo sa korte kag sa prisuhan. Ginabasa ko man ang madamo nga eksperiensia sa aton publikasyon. Madamo man ako sing nabasahan nga makapalig-on nga mga teksto sa Biblia.

“Sang adlaw nga nag-atubang ako sa korte, ginpabasa sa akon sang isa ka brother ang Isaias 30:15 nga nagasiling: ‘Mangin mabakod kamo kon magpakalinong kamo kag magsalig sa akon.’ Ini nga teksto nakabulig sa akon nga mangin kalmado kag magsalig pirme kay Jehova. Ginpamalandungan ko ini nga teksto kag nakabulig gid ini sa akon sang napriso ako.”

Puerte ka budlay sang sitwasyon sa prisuhan, pero ang pinakamabudlay para kay Eziz kay napahilayo sia sa iya pamilya. “May kadungan ako nga mga brother nga napriso man, kag nangin close gid ako sa ila. Ginbuligan nila ako nga mabatas ang akon kahidlaw sa akon pamilya kag mga abyan.”

Ginpanikasugan man ni Eziz nga makapanaksi. Nagsiling sia: “Sang primero, ’gapangakig ang iban nga priso kon ginasugid ko sa ila ang akon ginapatihan. Pero sang ulihi, namati na man lang sila sa akon. May bag-o nga mga priso nga indi man gusto mamati kon ginapanaksihan ko sila. Pero ginabuligan ako sang madugay na nga mga priso nga namati na sa akon, kag sila na mismo ang nagasugid sang ila natun-an halin sa akon sa bag-o nga mga priso.”

Para makahanda kita sa mga pagtilaw sa palaabuton, si Eziz nagsiling: “Ginapalig-on ko kamo nga magtuon sing maayo kag mangamuyo gid pirme kay Jehova. Isugid sa iya ang tanan ninyo nga ginakabalak-an, ang inyo mga ginakahadlukan, kag ang inyo ginabatyag. Isugid ninyo kay Jehova ang tanan.

“Ginbuligan ako ni Jehova nga mabatas ini nga pagtilaw. Gani wala ako nahadlok sa bisan ano man nga pagtilaw nga maeksperiensiahan ko sa ulihi kay sigurado nga buligan ako liwat ni Jehova.”—Salmo 118:6.