Sang Agosto 6, 2020, ginsentensiahan sang korte sa Turkmenistan sanday Brother Eldor kag Sanjarbek Saburov nga mapriso sing duha ka tuig bangod sa ila pagpangindi nga magsoldado bangod sa ila konsiensia. Wala ginbaton sang korte ang pag-apelar sang mag-utod nga sanday Eldor, nga 21 anyos, kag Sanjarbek, nga 25 anyos. Amo na ini ang ikaduha nga tion nga ginsentensiahan sila nga guilty bangod sang ila neutralidad.

Sang 2016, matinahuron nga nagpangindi nga magsoldado si Brother Sanjarbek Saburov. Gani, ginsentensiahan sia nga guilty kag ginbutang sa probation sing duha ka tuig.

Pagkasunod nga tuig, nagpangindi man nga magsoldado ang iya manghod nga si Eldor. Gani ginsentensiahan sia sing duha ka tuig nga pagtrabaho sa prisuhan kag ginakuha sang gobierno ang 20 porsiento sang iya sueldo.

Suno sa layi sang Turkmenistan, puede pasakaan liwat sang kaso kriminal ang mga nagapangindi nga magsoldado bangod sa ila konsiensia kon mangindi sila gihapon. Sang Abril 2020, ginpatawag liwat sang militar ang mag-utod para magsoldado. Pero pareho sila nga nangindi. Gani, ginkasuhan sila bilang mga kriminal, ginpamatbatan nga guilty, kag ginpriso.

Ang ila pagkapriso nagresulta, indi lang sing kasubo sa ila mga ginikanan, kundi sing iban pa nga kabudlayan. Ang ila tatay madugay na nga nagaantos sang pagpanalakit sa likod, amo nga indi sia makapangabudlay. Nagatanom sang cotton ang iya mga anak nga lalaki para maamanan ang ila mga kinahanglanon. Pero bangod napriso na sila, wala na sing magaaman sang kinahanglanon sang ila mga ginikanan. Sa baylo, sila na ang dapat magaaman sa mga kinahanglanon sang ila kabataan nga ara sa prisuhan.

Wala sing alternative civilian service sa Turkmenistan. Bilang resulta, ang aton pamatan-on nga mga brother nga nagapangindi nga magsoldado bangod sang ila konsiensia magapangatubang sang isa asta apat ka tuig nga pagkapriso. Sa kabilugan, may napulo ka pamatan-on nga mga Saksi, lakip ang mag-utod nga Saburov, ang napriso sa Turkmenistan bangod sa ila neutralidad.

Nagasalig kita nga pakamaayuhon ni Jehova ang aton pamatan-on nga mga brother sa Turkmenistan bangod sang ila maisog nga panindugan. Kabay nga dumdumon sang kada isa sa ila ang promisa ni Jehova kay Hari Asa: “Magpakabakod kamo kag indi kamo magpaluya, kay padyaan kamo sa inyo ginahimo.”—2 Cronica 15:7.