Sang Nobiembre 12, 2019, ginsentensiahan sang isa ka korte sa Turkmenistan nga mapriso sing tatlo ka tuig ang 26 anyos nga si Brother Serdar Dovletov. Si Brother Dovletov isa sa napulo ka mga brother sa ila pungsod nga ginsentensiahan nga mapriso kay nangindi sila nga magsoldado bangod sang konsiensia. Ang pito sa ila ginpamatbatan nga nakasala sang 2019 kag ang tatlo sang 2018. Lainlain ang kalawigon sang pagpriso sa ila, halin sa isa asta sa apat ka tuig.

Si Brother Dovletov halin sa siudad sang Baýramaly, sa Mary Region, sa southeastern Turkmenistan. Ang iya asawa nga si Surya kag ang iya iloy nga si Sonya mga Saksi ni Jehova man.

Ang pagbista kay Brother Dovletov nagsugod sang Nobiembre 11, 2019. Ginpaathag ni Brother Dovletov sa korte nga ang iya pagpangindi nga magsoldado bangod sang konsiensia nabase sa iya personal nga pagtuo. Dugang pa, may tatlo ka doktor nga nagtestigo nga si Brother Dovletov may ara chronic duodenal ulcer kag dapat exempted sia sa pagsoldado.

Bisan pa sini, ang hukom nagdesisyon nga si Brother Dovletov may sala bangod nangita sia kuno sing rason nga makalikaw sa pagsoldado, kag bangod sini, dapat sia mapriso. Ginapaabot nga sa indi magdugay, iupod man sia sa siam ka mga brother nga napriso sa Seydi labor camp sa desyerto sang Lebap Region, diin grabe gid kabudlay ang kahimtangan. Iapelar ni Brother Dovletov ini nga desisyon.

Samtang padayon nga nagaatubang sing inhustisya ang aton mga brother sa Turkmenistan, ginalakip naton sila sa aton pangamuyo upod ang bug-os nga pagtuo sa promisa ni Jehova nga suportahan sila bangod sang ila kaisog kag sa ila pagpabilin nga matutom sa iya.—Salmo 37:18, 24.