Sang Enero 18, 2021, ginsentensiahan sang isa ka korte sa Turkmenistan nga mapriso sing duha ka tuig si Brother Artur Yangibayev kay nangindi sia nga magsoldado bangod sa iya konsiensia. Ikaduha na ini nga bes nga ginsentensiahan sia bangod sa iya neutral nga panindugan.

Artur Yangibayev

• Natawo: 1997 (Seydi)

• Biograpiya: Sang bata pa si Artur, madamo sia sing gin-atubang nga mga problema. Bangod sini, ginpaligban niya kon ngaa wala gid sing katarungan sa kalibutan. Ginpamangkot niya ini sa iya utod nga babayi, nga isa sa mga Saksi ni Jehova. Dayon, nagtuon sia sa Biblia sang 13 anyos sia, kag nabawtismuhan sia sang 2014

  Nagaobra sia sa konstruksion bilang manug-renovate sang mga apartment. Para sa mga ginikanan ni Artur, isa sia ka mabuot kag responsable nga bata. Ginarespeto man sia sang ila mga kaingod bangod isa sia ka honest nga pamatan-on sa ila lugar

Sang Agosto 8, 2016, ginbutang si Artur sa pretrial detention kay nangindi sia nga magsoldado bangod sa iya konsiensia. Sang Agosto 30, ginsentensiahan sia sing duha ka tuig nga pagtrabaho samtang ara sa prisuhan. Sang Septiembre 2018, natapos ni Artur ang sentensia sa iya.

Sang Disiembre 15, 2020, ginpatawag sia para magsoldado sa ikaduha nga bes. Dayon, ginkuestyon sia sa opisina sang piskal kag ginmanduan nga ipaathag sa sulat kon ngaa indi sia magsoldado.

Sang Disiembre 30, ginpahibalo sia sang opisina sang piskal nga ginpasakaan sia sing kaso kriminal. Ginkuha man ang iya passport.

Si Artur nagsiling nga pagkatapos sang iya una nga sentensia “ang teksto sa Biblia sa Roma 8:37-39 naghatag sa akon sing kompiansa nga wala sing bisan ano nga makabalabag sa akon nga mangin matutom kay Jehova.” Kabalo kita nga sa bulig ni Jehova, mabatas liwat ni Artur ini nga pagtilaw.