Sang Enero 19, 2021, ginsentensiahan sang isa ka korte sa Turkmenistan nga mapriso sing duha ka tuig si Brother Veniamin Gendjiyev kay nagpangindi sia nga magsoldado bangod sa konsiensia.

Veniamin Gendjiyev

• Natawo: 2000 (Seydi)

• Biograpiya: Ginpadaku sia sang iya mga ginikanan bilang isa sa mga Saksi ni Jehova. Nagsugod sia sa pagbantala sang 15 anyos sia kag nabawtismuhan sa edad nga 19. Para sa mga nakakilala sa iya, isa sia ka tawo nga mapainubuson kag pirme nagapakig-istorya sa iban

  Isa sia ka mekaniko. Nanamian sia maggitara. Ginyaguta sia sang iya mga skulmeyt bangod sa iya mga pagpati amo nga natun-an niya nga pangapinan ang iya panindugan nga base sa Biblia

Sang Hulyo 2018, ginsentensiahan si Veniamin nga mapriso sing isa ka tuig kay indi sia magsoldado bangod sa iya konsiensia. Nakagua sia sang Hunyo 25, 2019.

Sang Disiembre 25, 2020, ginpatawag sia sa opisina sang piskal sang Dyanev District. Gusto sang mga awtoridad nga ipaathag niya sa sulat kon ngaa indi sia magsoldado. Sang Disiembre 30, 2020, ginpahibalo sia sang opisina sang piskal nga ginpasakaan sia sing kaso kriminal sa ikaduha nga bes. Ginkuha man ang iya passport.

Parte sa iya una nga pagkapriso, si Veniamin nagsiling: “Nabatyagan ko gid ang bulig ni Jehova. Ginhatagan niya ako sing kusog kag mas nagbakod pa gid ang akon pagtuo. Nagpangamuyo ako kay Jehova kag ginsugid ko ang maayong balita sa pareho ko nga mga priso. Nakabulig gid ini sa akon kon nagaluya ang akon buot.

“Sang ara ako sa prisuhan, ginasugid sa akon sang akon mga ginikanan ang pagpangamusta sang iban nga indi makabisita sa akon. Nakabulig gid ini sa akon nga makabatas asta nga matapos ang akon sentensia.”

Ang isa ka teksto nga nakapabakod gid kay Veniamin amo ang Isaias 54:17. Ang umpisa sini nagasiling, “Wala sing ginhimo nga hinganiban nga magmadinalag-on batok sa imo.” Ang mga teksto pareho sini kag ang aton mga pangamuyo, makabulig sa iya nga mabatas ini nga pagtilaw sa iya pagtuo.