Sang Enero 19, 2021, nagdesisyon ang korte sa Turkmenistan nga guilty si Brother Ihlosbek Rozmetov. Ginsentensiahan sia nga mapriso sing duha ka tuig sa isa ka prisuhan nga guardiado katama kay indi sia magsoldado. Amo ini ang ikaduha nga bes nga ginpriso sia bangod sa iya neutral nga panindugan.

Ihlosbek Rozmetov

• Natawo: 1997 (Andalib)

• Biograpiya: May duha sia ka utod kag sang pulo pa lang sia ka tuig nagasugod na sia obra pagkatapos sang iya klase para makabulig sa iya pamilya. Mahilig sia sa sports, magbasa sing libro, kag mamati sing music. Sang 2010, nagtuon sing Biblia ang iya iloy, kag pagligad sang isa ka tuig nagtuon man sia

Sang Hulyo 11, 2018, si Ihlosbek Rozmetov nga 20 anyos pa lang sadto, ginsentensiahan nga mapriso sing isa ka tuig sa Seydi labor camp kay indi sia magsoldado bangod sa konsiensia. Ginpagua sia sang natapos niya ang iya sentensia. Pero base sa kasuguan sang Turkmenistan mahimo sia kasuhan liwat sa ikaduha nga bes kon magpangindi gihapon sia nga magsoldado kon ipatawag sia sang gobierno.

Sang Nobiembre 25, 2020, ginpatawag liwat sang gobierno si Ihlosbek para magsoldado. Matinahuron niya nga ginpaathag ang iya mga pagpati bilang isa ka Cristiano. Pero, ginpasakaan sia sing kaso kriminal sang mga awtoridad, kag mas malawig ang ginsentensia sa iya kay ikaduha na ini nga bes nga nangindi sia nga magsoldado.

Si Ihlosbek nagsiling nga “mabudlay gid” ang iya naeksperiensiahan sa prisuhan. Nagsiling sia nga ang nakabulig sa iya nga mabatas ang mabudlay niya sitwasyon amo ang mga teksto nga iya nabasa kag nasaulo antes sia ginpriso. Ang pagpamalandong sa Filipos 4:6, 7 amo ang isa nga nakabulig gid kay Ihlosbek. Nagpahanumdom ini sa iya nga ‘indi magkabalaka sa bisan ano nga butang,’ nga mangamuyo sang “paghidait sang Dios,” kag mangin kalmado lang kon makaeksperiensia sia sang makapa-stress nga mga sitwasyon. Si Ihlosbek nagsiling, “Pirme ako nagapangamuyo kay Jehova sa mga kabudlayan nga akon naeksperiensiahan kag nabatyagan ko gid nga ara sia sa akon tupad.”

Nagasalig kita nga padayon nga pabakuron ni Jehova si Ihlosbek kag ang tanan nga nagalaum sa Iya.—Isaias 40:29-31.