Sang Enero 18, 2021, nagdesisyon ang isa ka korte sa Turkmenistan nga guilty si Brother Maksat Jumadurdyyev. Ginsentensiahan sia nga mapriso sing duha ka tuig kay indi sia magsoldado bangod sa iya konsiensia.

Maksat Jumadurdyyev

• Natawo: 2000 (Seydi, Lebap Region)

• Biograpiya: May duha sia ka utod nga babayi. Maalam sia nga estudyante. Mahilig sia sa sports. Eksperto sia magdrowing kag mag-paint sang mga piktyur. Kilala sia sa ila lugar nga mapainubuson, honest, kag mapisan nga tawo

  Nagtuon sia sa Biblia sang 2018 kag nabawtismuhan sang 2019. Sia lang ang Saksi ni Jehova sa iya pamilya

Napriso na si Brother Maksat Jumadurdyyev sing isa ka tuig kay indi sia magsoldado. Nakagua sia sang Hulyo 17, 2019. Pero sa Turkmenistan ang mga nagapangindi nga magsoldado mahimo kasuhan sing duha ka beses. Gani sang Marso 2020, ginpatawag liwat si Maksat para magsoldado. Naghimo sia sing sulat nga nagapahibalo nga nagapangindi gihapon sia nga magsoldado, kag naintiendihan niya nga mahimo sia prisuhon sa ikaduha nga bes bangod sini.

Pila ka beses nga gin-interogar si Maksat sang mga awtoridad kag ginpaeksamin nila sia sa doktor. Sang Disiembre 30, 2020, ginpahibalo sia nga ginpasakaan sia sing kaso kriminal. Ginkuha man sang mga awtoridad ang iya passport.

Mabudlay gid ang iya una nga pag-atubang sa korte kag pagkapriso. “Sang ginpriso ako sang 2018,” siling ni Maksat, “ang pinakamabudlay para sa akon amo ang pagbulag sa akon mga ginikanan. . . . Indi mga Saksi ni Jehova ang akon mga ginikanan, gani nagsiling sila nga kon indi ako magsoldado, indi gid nila ako pagbuligan.”

Si Maksat nagsiling: “Indi ko makaupod ang akon pamilya kag mga abyan. Pero nakabulig gid sa akon ang Marcos 10:29, 30. Si Jesus nagsiling nga kon may ginsakripisyo kita para sa iya kag sa maayong balita, makabaton kita sing isa ka gatos ka pilo sini.”

Sang ara sia sa prisuhan, pirme gid nakita ni Maksat nga ginasabat dayon ni Jehova ang iya mga pangamuyo kag ginabuligan sia nga maatubang ang mga kabudlayan. Ginadumdom gid pirme ni Maksat ang ginasiling sang Josue 1:9: “Magpakaisog ka kag magpakabakod. Indi ka mahadlok, kay kaupod mo si Jehova nga imo Dios bisan diin ka magkadto.”

Antes sang iya ikaduha nga pag-atubang sa korte, nagsiling si Maksat nga determinado gid sia nga sundon ang iya konsiensia nga nahanas sa Biblia. Nagsiling sia: “Bisan pa mapriso ako sa ikaduha nga bes, nagatuo ako nga buligan ako ni Jehova bisan ano man ang matabo. Ang laygay sa Filipos 4:6, 7 nakabulig sa akon nga mangin maisog kag kalmado lang.”

Ginalakip naton sa aton mga pangamuyo ang aton utod nga si Maksat kag ang iban pa nga pamatan-on nga mga brother nga determinado nga suportahan ang pagkasoberano ni Jehova. Nagasalig kita nga padyaan gid ni Jehova ang katutom sang aton mga kauturan nga ara sa prisuhan.—Bugna 2:10.