Sang Pebrero 10, 2021, nagdesisyon ang isa ka korte sa Turkmenistan nga guilty si Brother Nazar Alliyev kag ginsentensiahan sia nga mapriso sing isa ka tuig kay indi sia magsoldado bangod sa iya konsiensia.

Nazar Alliyev

• Natawo: 2000 (Lebap Region)

• Biograpiya: Nagaistar sia sa Türkmenabat upod sa iya nanay kag duha ka utod. Nanamian sia mag-volleyball kag mag-soccer. May balatian sia sa tagipusuon. Nagaobra sia bilang barbero para makabulig sa pagsuporta sa ila pamilya

  Gintudluan sia sang iya nanay sang mga prinsipio sa Biblia. Nabawtismuhan sia sang 2015 sa edad nga 14. Para sa mga nakakilala sa iya, isa sia ka malipayon, maalwan, kag mapainubuson nga pamatan-on. Nalipay ang iya pamilya sa iya desisyon nga indi magsoldado

Sang Mayo 16, 2020, gindala si Brother Nazar Alliyev sa isa ka military enlistment office. Ginpilit sia sang mga soldado nga magsuksok sing uniporme sang militar, bilang tanda nga mangin soldado na sia, pero wala gid sia nagpasugot. Sang Mayo 28, nakig-istorya si Nazar sa mga opisyales sa ikaduha nga tion kag sa liwat nagpangindi sia nga magsoldado. Pagkadason nga bulan, nagsulat si Nazar sa district enlistment office nga nagapaathag sang iya mga pagpati.

Sang Enero 4, 2021, si Nazar kag ang iya nanay nagkadto sa opisina sang piskal sa distrito sang Khojambaz. Ginpaathag ni Nazar kon ngaa indi sia magsoldado kag nagpangabay nga pasugtan sia nga maghimo sing alternative service. Pero bisan amo sini ang iya ginhimo, ang imbestigador nagsiling nga pasakaan sing kaso si Nazar.

Si Nazar, nga 20 anyos subong, nagsiling: “Kon magsalig ka kay Jehova sa amo sini nga mga sitwasyon, hatagan ka niya sing kalinong. Sa bulig ni Jehova, makahambal ka sing kalmado.”

Nagsiling pa gid sia: “Kon balikan ko ang mga natabo, nakita ko gid nga ginabuligan ako pirme ni Jehova. Bangod sini, nagasalig ako nga buligan man niya ako sa palaabuton.”

Wala sing alternative civilian service sa Turkmenistan. Bangod sini, ang pamatan-on nga mga brother nga indi magsoldado bangod sa ila konsiensia mahimo mapriso sing asta sa duha ka tuig. Subong, may 15 ka brother nga ara sa prisuhan sa Turkmenistan bangod sang ila neutral nga panindugan.

Kabalo kita nga si Jehova padayon nga ‘nagaunong’ kay Nazar kag sa iban pa nga pamatan-on nga mga brother sa Turkmenistan.—Salmo 18:25.