Si David Petrosov isa ka 19 anyos nga brother sa Turkmenistan. Bisan tin-edyer pa lang sia, ginbatas niya ang isa ka mabudlay nga pagtilaw sa iya pagtuo: ginpriso sia sing isa ka tuig bangod nagpangindi sia nga magsoldado. Ginpagua sia sang Septiembre 30, 2020.

Si Brother Petrosov nagsiling: “May mga adlaw man sa prisuhan nga makabatyag ako sing kasubo. Pero ginpaumpawan gid ako ni Jehova paagi sa iya Pulong. Bal-an ko nga naintiendihan ako ni Jehova kag nagahimo gid sia sing paagi nga mapaumpawan ako, gani nagapangamuyo ako sa iya. Madamo nga teksto ang nakabulig sa akon sa sarisari nga sitwasyon, pero ang pirme ko gid madumduman amo ang Filipos 4:13.”

Si Brother Petrosov natawo sa Ashgabat, nga kapital sang Turkmenistan. Samtang nagadaku sia nakatuon sia magtokar sang gitara. Nanamian sia magkomposo sang mga kanta kag magtener sa gua—mag-soccer, mag-hike sa kabukiran, kag maglangoy sa mga linaw sa ila lugar.

Gintudluan sia sing Biblia sang iya klasmeyt nga isa sa mga Saksi ni Jehova, kag ginbawtismuhan sia sang 2019. Bisan pa nga si David lang ang Saksi ni Jehova sa iya pamilya, ginarespeto nila ang iya pagtuluuhan kag pagtuo sa Dios.

Wala madugay sa tapos sia mabawtismuhan, gindala si David sa korte bangod nagpangindi sia nga magsoldado. Wala sing ginatanyag nga alternative civilian service ang Turkmenistan, gani sentensiahan sia sang mga awtoridad nga mapriso sing isa ka tuig.

Sa sulod sang isa ka tuig nga ara sia sa prisuhan, ginhatagan ni Jehova si Brother Petrosov sang bulig nga kinahanglan gid niya. “Sang ara ako sa prisuhan, ginaistorya sa akon ni Nanay ang tanan nga kauturan nga nagapangamusta sa akon bisan pa indi sila makabisita sa akon,” siling ni Brother Petrosov. “Nalipay gid ako kay siling niya pirme ako ginapangamuyo sang mga kauturan.”

Base sa kasuguan sang Turkmenistan, kabalo si David nga puede sia ipatawag para magsoldado sa ikaduha nga tion. Kon ipatuman ini nga kasuguan, mahimo sia pamatbatan nga guilty kag prisuhon sing mas malawig.

Si David nagsiling: “Wala sing tawo nga gusto magbalik sa prisuhan. Pero wala ako nahadlok. May kaisog ako kag pagsalig bangod sa akon pagtuo kay Jehova, kag napabakod man ako sang akon mga kauturan kag sang aton mga Kingdom song.”

Kumbinsido kita nga padayon nga hatagan ni Jehova si David sang pagtuo kag kaisog. Ginapangamuyo man naton ang pulo pa ka brother sa Turkmenistan nga ginapriso gihapon kay nagpangindi sila nga magsoldado bangod sa ila konsiensia. Kabalo kita nga si Jehova nagapalangga, nagadumdom, kag nagasuporta sa ila.—Salmo 69:33.