Sa indi madugay, a ipahibalo sang military court sang Turkmenistan ang desisyon sini sa kaso ni Brother Ruslan Artykmyradov. Mahimo sia prisuhon sing duha ka tuig kay nangindi sia nga magsoldado bangod sa konsiensia. Halin sang Disiembre 15, 2020, ginbutang na sia sa pretrial detention. Amo ini ang ikaduha nga bes nga maatubang sia sa korte. Mahimo sia mapriso liwat bangod sa iya neutral nga panindugan.

Ruslan Artykmyradov

• Natawo: 2000 (sa village sang Alpan Gengeshlik)

• Biograpiya: Nagdaku sia sa uma. Isa sia ka mekaniko. Maalam sia nga estudyante kag nanamian sia maghampang sing soccer

  Gintudluan sia sang iya iloy sang mga prinsipio sa Biblia. Nanamian gid sia sa pagpalanggaanay kag paghiusa sang mga Saksi ni Jehova, kag nabawtismuhan sia sang 2015 sang 15 anyos sia. Bangod palangga niya si Jehova nga Dios, nagpangindi sia nga magsoldado

Sang Agosto 13, 2018, si Brother Ruslan Artykmyradov, nga 18 anyos pa lang sadto, ginsentensiahan nga mapriso sing isa ka tuig kay nangindi sia nga magsoldado. Natapos niya ang iya sentensia, kag ginpagua sia sang Agosto 12, 2019.

Base sa kasuguan sang Turkmenistan, ang pamatan-on nga mga lalaki puede kasuhan kag prisuhon sing duha ka beses kon indi sila magsoldado. Gani sang Nobiembre 2020, ginpatawag liwat si Ruslan para magsoldado.

Pero, nangindi sia liwat nga magsoldado, bisan kabalo sia nga puede sia mapriso sa ikaduha nga bes. Sang Disiembre 15, 2020, gin-aresto sia kag ginbutang sa pretrial detention samtang nagahulat sang iskedyul sang hearing sang korte.

Determinado gid si Ruslan nga magpabilin nga matutom kay Jehova. Parte sa iya una nga pag-atubang sa mga korte, nagsiling sia: “Wala ’ko nahadlok bisan pa bal-an ’ko nga budlay ’ni kag indi gid patas ang desisyon. Indi ko gid pag-ibaylo ang akon kalipay kag ang akon suod nga kaangtanan kay Jehova.”

Indi gid mahapos ang kabuhi ni Ruslan sa prisuhan. Miserable gid ang iya sitwasyon, kag pirme lang sia ginamaltrato. Pero pirme gid niya mabatyagan nga ginabuligan sia ni Jehova. Si Ruslan nagsiling: “Sang ara ako sa prisuhan, pirme gid ako ginabuligan ni Jehova ilabi na kon ginakastigo ako. Ang una lang nga bakol ang masakit kag indi ko na mabatyagan ang masunod nga mga bakol.” Ginsuportahan man sia sang mga kauturan. Nagpabakod gid ini sa iya, kag nangin maayo man ini nga panaksi sa mga kaupod niya sa prisuhan.

Bisan pa puede sia mapriso sa ikaduha nga bes, sigurado si Ruslan nga buligan sia ni Jehova. Nagsiling sia: “Nagatuo gid ako nga padyaan ako ni Jehova. . . . Kon mabakod ang imo paglaum, indi gid madula ang imo kalipay. Kag kon malipayon ka, makabulig ini sa imo nga mangin mabakod kag makabatas. Kag kon mabakod ka, makapabilin ka gid nga matutom.”

Nagapasalamat gid kita sa halimbawa ni Ruslan kag sang iban pa nga maisog nga mga pamatan-on. Ginapakita sang ila mga ginhimo nga mabuligan gid kita ni Jehova nga mangin maisog para maatubang naton ang bisan ano nga pagtilaw kag indi madula ang aton kalipay. Kag kabalo man kita nga pagapadyaan gid ang ila katutom sa Ginharian sang Dios.—Hebreo 11:6.