Sa wala ginapaabot, ginhatagan sang amnestiya ni Presidente Gurbanguly Berdimuhamedov ang walo ka Saksi ni Jehova sa Turkmenistan nga ginpriso bangod sa ila pagtuo. Upod sila sa iban pa nga mga priso nga ginpagua sang Oktubre 22, 2014. Anom sa sini nga mga Saksi ang ginpriso kay nagpangindi nga magsoldado bangod sa konsiensia kag ang duha bangod sa sayop nga panumbungon sa mga hilikuton sang relihion.

Ang mga nagpangindi nga magsoldado bangod sa konsiensia, mga pamatan-on nga nagaedad sing 18 asta 23, ginpriso sa Seydi Labor Colony, nga ara sa desyerto sang Turkmenistan. Sanday Merdan Amanov, Pavel Paymov, Suhrab Rahmanberdyyev, kag Amirlan Tolkachev ginpriso sa general regime camp. Kag sanday Matkarim Aminov kag Dovran Matyakubov (wala sa piktyur) ginbutang sa mas estrikto nga regime camp, bangod ginsentensiahan sila nga “naghimo liwat sang krimen.” Samtang sa prisuhan, ginbatas nila ang mapintas nga pagtratar kag mabudlay nga sitwasyon.

Ginbutang man sa general regime camp sa Seydi ang 35 anyos nga si Aibek Salayev kag ang 42 anyos nga si Bahram Shamuradov, mga Saksi nga ginpriso bangod sa sayop nga panumbungon. Pareho sila nga ginsentensiahan sing apat ka tuig nga pagkapriso bangod sa ila pagtuo kag paghimo sang mga hilikuton sang ila relihion. Wala labot nga ginpriso sila bangod sa planted nga mga ebidensia, nag-antos sila sang grabe nga pagmaltrato sa prisuhan.

Si Ruslan Narkuliev na lang ang Saksi nga napriso sa Turkmenistan. Nangindi sia nga magsoldado bangod sa konsiensia amo nga ginpriso sia mga pila lang ka semana antes sang amnestiya, kag posible nga ang iya ngalan wala madala sa listahan sang mga ginhatagan sing amnestiya sang Presidential Administration. Ginaasikaso na sang iya mga abogado sa awtoridad sang Turkmenistan ang mga kinahanglanon para mapagua sia.

Dalayawon gid ang desisyon ni Presidente Berdimuhamedov sang ginhatagan niya sing amnestiya ang walo ka lalaki nga napriso bangod sa ila pagtuo. Ang mga nagapabalor sa kahilwayan sang relihion nagalaum nga panugod na ini sang pagbag-o sa Turkmenistan. Isa ka pagbag-o nga magatugot sa mga Saksi ni Jehova nga magkabuhi base sa ila konsiensia kag indi na mahadlok nga hingabuton ukon prisuhon.