Sang aga sang Pebrero 24, 2022, nakabugtaw ako bangod sang mabaskog nga sinigabong. Sang primero, abi ko nagapanaguob lang kay nagaulan, pero mga lupok na gali sang bomba ang akon nabatian.

Narealisar ko nga dapat ako maghalin sa balay, kay ara ini sa sentro sang Mariupol. Pagkadason nga adlaw, nagkadto ako sa balay sang akon lola nga si Iryna, nga malayo sa sentro sang siudad. Sang ulihi, nag-apas man didto ang akon iloy nga si Kateryna, kag updanay na kami tanan didto ni Lola kag sang akon pakaisa. Medyo safe man kami sa balay ni Lola, pero sa basement kami nagtulog sa sulod sang pila ka adlaw.

Isa ka adlaw, may missile nga nagtupa sa amon garden sang mga utanon samtang nagapanago kami sa basement. Daw mabungol kami sa kabaskog sang paglupok. Nangamuyo ako sing hanuot kay Jehova. Pagligad sang isa ka semana, indi na safe nga magtener sa balay ni Lola, gani nagdesisyon kami nga magbalik sa sentro sang siudad para mangita sing paagi nga makabakwit. Nagpakitluoy ako kay Jehova nga buligan kami nga mangin safe kag makagua sa siudad.

Aga sadto sang Marso 4. Wala sing tren nga nagabiyahe halin sa Mariupol kay ginabombahan ang siudad. Gani nagpanago kami sa sinehan sang siudad upod sa ginatos nga iban pa sa sulod sang pulo ka adlaw. Sobra gid ini kagutok amo nga sa salog kami nagatulog. Mahigko ang palibot kag mabudlay makakuha sang pagkaon kag mainit nga tubig. Dapat kami magpila sing inoras.

Isa ka adlaw, may missile nga naglupok malapit sa sinehan. Mabaskog gid ini amo nga nagkalabuka ang madamo nga bintana gani nagasulod na sa sinehan ang matugnaw nga hangin.

Ano ang nakabulig sa akon sa sining mabudlay nga tion? Ang istorya sang kabuhi ni Job. Kon makita ko nga naga-panic ang mga tawo bangod sa mga lupok, ginabasa ko ang istorya sang kabuhi ni Job sa akon Biblia. Nagakalma dayon ako. Daw pareho lang nga nagapungko ako sa sinehan upod kay Job kag ginasilingan ko sia: “Naintiendihan ko na ang imo ginabatyag!” Nadula kay Job ang tanan: ang iya pamilya, ang iya maayong panglawas, kag ang iya mga pagkabutang. Nadula man ang akon materyal nga mga pagkabutang. Pero kaupod ko ang akon pamilya, buhi kami tanan, kag may maayong panglawas. Narealisar ko nga mas maayo ang akon sitwasyon sangsa sitwasyon ni Job. Nakahatag ini sang paumpaw sa akon.

Sang Marso 14, nabalitaan namon nga may isa ka grupo nga nakapalagyo pagua sa siudad. Gani nagdesisyon kami nga maglakat man. Nakakita kami sang masakyan upod ang iban halin sa sinehan.

Beinte ka salakyan ang nag-convoy pagua sa siudad. Katorse ang nakaigo sa likod sang isa ka cargo van gani nagaginutok lang kami. Nagalinupok ang mga bomba sa palibot namon samtang nagabiyahe kami. Wala untat ang akon pagpangamuyo. Sang nakagua na kami sa Mariupol, ginpadulog sang drayber ang salakyan, nanaug sia, kag naghilibion. Madamo gid nga landmine ang ginlikawan niya sa dalan. Nabalitaan man namon nga duha ka adlaw sa tapos kami makapalagyo, ginbombahan ang sinehan kag mga 300 ka tawo ang napatay.

Pagligad sang 13 ka oras, nag-abot kami sa Zaporizhia. Pagkaaga, nagsakay kami sa tren pakadto sa Lviv. Disiseis kami sa isa ka bagon sang tren nga para lang sa apat ka tawo. Bangod sina, sobra kainit. Nagatindog lang ako sa alagyan sa halos bilog nga biyahe. Amo lang ina ang paagi para makahaklo sang preska nga hangin. Sang Marso 16, nag-abot kami sa Lviv, diin gin-abiabi kami sing maayo sang aton mga kauturan. Nagtener kami sa isa ka Kingdom Hall sa sulod sang apat ka adlaw. Nakahibi ako sa kalipay bangod sa pag-atipan sang mga kauturan. Regalo ini ni Jehova.

Sang Marso 19, nagdesisyon kami nga maghalin sa Ukraine kag magkadto sa kaingod nga pungsod nga Poland. Pag-abot namon didto, ako, ang akon lola, ang akon iloy, kag ang akon pakaisa, gin-abiabi sang mga kauturan. Ginhatagan nila kami sang tanan nga kinahanglan namon. Nabatyagan namon nga palangga gid nila kami.

Disinuebe anyos pa lang ako, pero bangod sa naagyan ko nga mga kabudlayan, natun-an ko nga importante gid nga pabakuron ko ang akon pagtuo samtang maayo pa ang sitwasyon. Ang pagtuo makabulig sa imo nga malampuwasan ang mga kabudlayan. Kon wala ako sang personal nga pagtuon antes sang inaway, posible nga mas ginbudlayan pa gid ako.

Si Jehova mapinalanggaon nga Amay. Nabatyagan ko nga ginauyatan niya ang akon tuo nga kamot kag ginatabid ako pagua sa sadtong mabudlay nga sitwasyon. Ginapasalamatan ko gid sing daku si Jehova bangod sa tanan nga ginhimo niya para sa akon.—Isaias 41:10.