Sang Septiembre 3, 2019, ang European Court of Human Rights (ECHR) nagpapanaug sang desisyon nga pabor sa mga Saksi ni Jehova sa siudad sang Kryvyi Rih sa Ukraine. Ang Korte nagdesisyon nga ang konseho sang siudad sang Kryvyi Rih may nalapas bangod hungod sini nga wala gin-aprobahan ang permit nga kinahanglan sang mga kauturan para makapatindog sang Kingdom Hall.

Suno sa desisyon sang Korte, ang konseho sang siudad dapat magbayad sa duha ka kongregasyon nga nagapanag-iya sang propiedad sing 7,000 ka euro (ukon mga $7,768 U.S.) bilang danyos kag bayad sa ila mga gingasto sa kaso bangod ginlapas sang siudad ang international law—ang Article 9 (nagaamlig sa kinamatarong sang panghunahuna, konsiensia, kag relihion) kag ang Article 1 of Protocol No. 1 (nagagarantiya sang kinamatarong nga makatigayon sang propiedad) sang European Convention on Human Rights. Ang gobierno sang Ukraine ginhatagan sing tatlo ka bulan para iapelar ang desisyon sang Korte, kon gusto nila nga ipasaka ini sa mas mataas nga korte sang ECHR, ang Grand Chamber.

Sobra na 15 ka tuig ang nagligad sang nag-aplay ining duha ka kongregasyon sa Kryvyi Rih sang permit para makapatindog sila sang Kingdom Hall. Sang Agosto 9, 2004, nagbakal sila sang isa ka residential building sa isa ka lote nga ginapanag-iyahan sang siudad. Nag-aplay man sila sing permit nga maarkilahan ini nga lote sing lima ka tuig para mapatindugan sang Kingdom Hall. Sang Septiembre 28, 2005, ginhatagan sila sang konseho sang initial approval. Ginsilingan man sila sang konseho nga kinahanglan nila paaprobahan sa pila ka ahensia sang gobierno ang ila ginaplano nga ipatindog nga bilding para mahatagan sila sing permit kag para masugdan nila ang pagpatindog sini.

Ginhimo sang mga kauturan ang plano, ginpaaprobahan ini sa tanan nga ahensia sang gobierno nga nadalahig, kag gin-submit ini para sa final approval sa konseho sang siudad sang Agosto 23, 2006. Suno sa kasuguan, ang konseho dapat maghatag sang ila desisyon sa sulod sang isa ka bulan, pero wala gid ini nagsabat sa aplikasyon sang mga kauturan. Sang ulihi, ini nga kaso ginpasaka sa isa ka regional court. Suno sa korte, ang konseho sang siudad may nalapas nga kasuguan. Pero bisan pa sini, wala gihapon ini naghatag sang permit sa aton mga kauturan. Pagkatapos sang pila pa ka hearing sa iban nga mga korte, wala gihapon ginhatagan sang permit ang mga kauturan. Gani, sang Abril 13, 2010, ginpasaka nila ini nga kaso sa ECHR.

Nalipay kita nga ang desisyon sang ECHR pabor sa aton mga kauturan sa Kryvyi Rih. Ginapangamuyo naton nga ini nga desisyon sang ECHR makabulig para mangin mas mahapos sa aton mga kauturan nga makapatindog sang mga Kingdom Hall sa mga pungsod diin ginadumilian ang aton pagsimba.—Salmo 118:5-9.